WILLEMSTAD – Dia 27 di ougùstùs último, Javier Silvania den su kalidat komo Minister di Finansa a ekspresá na un radio emisora ku “Ansary a hòrta sèn na Ennia”. Parlamentario Steven Martina ke sa di dje ta kuantu sèn e eks doño merikano di Ennia, Husang Ansary a hòrta antó. E ke sa tambe si el a hasi denunsia di esaki.

Martina a manda su karta ayera pa Silvania, ku pa regla tin un máksimo di 2 luna pa kontestá. “E ekspreshon akí ta unu hopi pisá i a kousa hopi diskushon i spekulashon den nos komunidat. Hòrta sèn i sigur si tuma den konsiderashon e montanto di hopi mion den e kaos di Ennia, ta algu kastigabel. Sigur si tene kuenta ku e ekspreshon ku un titular, den e kaso akí Minister di Finansa, a hasi, ku na mes momentu ta polítikamente responsabel pa Banko Sentral i pa negosiashonnan ku Hulanda riba refinansiamentu di debenan pa solushoná entre otro e problema na Ennia. E ekspreshon di “Ansary a hòrta sèn na Ennia” ku Minister di Finansa a hasi, ta krea e impreshon ku Minister ta disponé di informashon ku otronan den gobièrnu i e aparato enkargá ku mantenshon di lei no ta disponé di dje.”

Segun Martina nos por konkluí antó ku porfin basá riba e ekspreshon di e Minister, ku por identifiká esun ku ta responsabel pa saka sèn for di Ennia. “Pasó si ta hòrtamentu di sèn tin na Ennia, esaki tin reperkushonnan sumamente grandi pa penshonadonan di Ennia, esnan ku tin ku bai baha ku penshon, esnan ku ta traha na Ennia, gobièrnu di Kòrsou i finalmente pueblo di Kòrsou, ku probablemente mester bai paga pa e konsekuensianan dje supuesto hòrtamentu di sèn na Ennia.” Segun Martina, e echo ku Silvania a hasi e ekspreshon ku “Ansary a hòrta sèn na Ennia”, pero ainda Silvania no a hasi denunsia di e echo kastigabel akí, ta lanta hopi diskushon i spekulashon den komunidat i ta meresé klaridat.

P’esei frakshon di MAN ta hasi e Minister di Finansa algun pregunta aklaratorio. E ke sa di Silvania si bèrdat el a hasi e ekspreshon ku “Ansary a hòrta sèn na Ennia” na radio. “Minister por informá kuantu sèn Ansary a hòrta na Ennia? Minister ta konsiderá loke Minister a ekspresá ku “Ansary a hòrta sèn na Ennia”, algu kastigabel? Ki dia nos por ferwagt ku Minister ta bai hasi denunsia di loke Minister a ekspresá ku “Ansary a hòrta sèn na Ennia”? Konseho di Ministernan (RvM) ta pará tras dje ekspreshonnan di Minister ku “Ansary a hòrta sèn na Ennia”, i tin un desishon di RvM riba esaki? Minister por indiká kiko ta e impakto dje ‘hòrtamentu di sèn di Ansary na Ennia’ pa komunidat di Kòrsou? Mirando e loke Minister a konstatá i ekspresá, esta ku “Ansary a hòrta sèn na Ennia”, lo informá Parlamento di Kòrsou di esaki? Si e kontesta ta ‘si’, manera kustumber Minister lo publiká esaki tambe riba medionan sosial?.