AMSTERDAM/WILLEMSTAD — Korte den Apelashon di Arnhem-Leeuwarden a dikta sentensia siman pasá den un kaso entre un hòmber i e fundashon De Alliantie, establesí na Hilversum na Hulanda. Ta trata di un disputa tokante e kontinuashon di un kontrakt di hür despues di fayesementu di su tata. Korte a rechasá e apelashon.

E hòmber a apelá kontra un sentensia verbal di un hues di Korte di Midden-Nederland na Almere, di 8 di febrüari aña pasa. Ta trata di un kaso den kua hues mester a para ketu na e pregunta sí e yu por a kontinuá ku e kontrakt di hür di su tata ku a fayesé ku De Alliantie. Su mayornan a hür un kas di 4 kamber for di De Alliantie for 1 di febrüari di 2003. Despues di morto di su mayornan, e tabatin e tarea di kontinuá e kontrakt di hür.

Hòf a tene kuenta ku e siguiente faktornan. E yu, kende a nase dia 21 di ougùstùs 1987, tabata inskribí na e adrès ei te dia 22 di novèmber 2007. Despues el a muda pa otro adrès kaminda e tabata studiando i biba huntu ku su èks-frei. Dia 21 di sèptèmber 2012 el a bolbe inskribí su mes na e adrès di su mayornan, i tabata inskribí aya te dia 24 di yüni 2014 ora ku el a muda pa Aruba i despues dia 22 di aprel 2016 a muda pa Kòrsou. Dia 1 di ougùstùs 2016 el a bolbe bai Hulanda i bolbe inskribí su mes na e adrès di su mayornan.

Despues na 2018 a konfirmá ku su mama tin kanser di pankreas. Dia 14 di desèmber 2020 e yu a bini bèk na Kòrsou kaminda el a partisipá sin èksito den e elekshonnan parlamentario. Dia 14 di ougùstùs 2021 su mama a fayesé i dia 8 di òktober di e aña ei el a bolbe inskribí su mes na e adrès di su mayornan. Dia 24 di aprel 2022 su tata tambe a fayesé.

E yu hòmber akí a bai Korte i a demandá serka hues pa determiná ku e por kontinuá e kontrakt di hür di e kas despues di morto di su tata tambe komo hürdó dje kas akí. E hues a rechasá e demanda ei i a otorgá e kontra-demanda di De Alliantie pa e sali for di e kas. No por ehekutá e desishon ei ainda, pasó hues no a deklará anteriormente ku mester ehekutá esaki dirèkt konforme e artíkulo 7:268 di Kòdigo Sivil, kaminda e tin derecho pa sigui usa e kas te ora ku a tuma un desishon final riba su demanda pa kontinuá e hür. E meta di su kehonan ta pa otorgá su demanda i rechasá esun di De Alliantie.

Pero no tin sufisiente prueba. Hòf a husga ku e sentensia di e hues ta keda firme. Hòf a trata e opheshonnan dje yu hòmber temátikamente i a yega na konklushon ku e no a kumpli ku su deber di presentá sufisiente prueba. Hòf a haña ku el a prueba insufisiente ku tabatin un bibá konhuntu i sostenibel entre e i su mayornan, esta ku e tabata forma un bibá den un periodo largu huntu ku su mayornan. Tampoko tabatin prueba ku a konvensé Hòf ku e tin derechi riba un pèrmit di bibienda pa e kas en kuestion. P’esei Hòf a rechasá su apelashon i a konden’é ademas na paga e gastunan dje proseso ku e fundashon De Alliantie mester a hasi den e prosedura sivil akí.