AMSTERDAM—Okupantenan ilegal di un edifisio den Vossiusstraat na Amsterdam di un ruso multimionario, por keda den e edifisio segun korte di apelashon.

E doño di e propiedat, e ruso multimionario Arkady Volozj, ta riba lista di sanshon Oropeo. Tur su propiuedatnan den Oropa ta di fris. Pa korte di apelashon esaki ta motibu pa no saka e okupantenan ilegal (krakers). Den korte di promé instansha tambe a bisa ku nan por keda den e edifisio. Volozj ta fundador di e sistema di búskeda riba internet ruso Yandex. E ta riba e lista di sanshon Oropeo pasobra si kompania lo a kompartí propaganda i manipulá resultadonan di buskeda tokante e guera na Ukraina, despues di invashon ruso. Durante tratamentu di e kaso tabata trata e pregunta si e edifisio den Amsterdam ta pa uso personal òf no. Pasobra Volozj ta riba lista di sanshon, no por tin benefisio finansiero di su propiedatnan. E mes por biba den e edifisio pero no por hur esaki. Segun su abogado e bibienda tabata intenshoná pa su famia biba. Apesar kun a momentu ku e okupantenan ilegal a drenta, tabatin trahadonan di konstrukshon ta trata, pues e no tabata bashí. Pero segun korte di apelashon no tin ningun indikashon ku Volozj i su famia lo kier bai biba na Amsterdam pronto. Hof ta konfirmá e veredikto di korte prome instansha ku e okupantenan ilegal no mester bandoná e edifisio pasobra esaki lo kondusí na desokupashon inhustufiká. Si Hof a atvertí e okupantenan ilegal ku nan no mester okashoná molester pa e bario. Segun abogado di Volozj frekuentemente tin fiestanan den e edifisio. E derecho di bibienda di e okupantenan ilegal no ta permit pa e aktividatnan aki, segun hues. E abogado di Volozj lo apela e kaso na Tribunal Supremo (Hoge Raad), e hues mas haltu den Hulanda. E ta mira e veredikto komo un aplikashon robes di e medidanan di sanshon Oropeo i violashon di derechonan di propiedat di famia.