WILLEMSTAD,—- Durante un reunion di Partijraad 27 di Mart 2024, lider polítiko di PAR sr Quincy Girigorie i sra Zita Jesus Leito a informá konhuntamente na miembronan di PAR ku sra Zita Jesus Leito lo kontinuá su trabou komo Parlamentario di forma independiente.

Despues di diferente kombersashon den kuadro di e trayekto di rebranding di PAR pa re- posishoná su mes pa e elekshon benidero na mart 2025, liderazgo di partido i sra Jesus-Leito tabata diferensiá di opinion riba e momentu i forma pa hasi esaki, pero despues di algun kombersashon nan a logra haña otro.

Partidonan a yega huntu na e desishon pa kontinuá ambos trayekto di forma separá riba un manera amikal konforme ideologia di partido.

Esaki ta sigur un ‘unicum’ ya ku den pasado vários biaha e motibunan pa un persona tuma un desishon asina, tabata basá riba un desakuerdo drástiko. Ta lógiko ku e desishon aki no tabata unu fásil pa partidonan embolbí.

Sra Jesus-Leito, durante hopi aña a sirbi pais i partido PAR ku alma i kurason, durante momentunan bon i malu. Komo tal, partidonan a palabrá ku lo komuniká huntu riba e trayekto aki.

PAR ta rekonosé e nesesidat di kambio, pa asina e partido por sirbi komunidat mihó, den un periodo nobo.  

PAR semper lo ta agradesido pa tur loke sra Jesus Leito a nifiká pa partido i pa komunidat i sra Jesus Leito semper lo ta agradesido pa tur e oportunidatnan ku el a haña pa sirbi komunidat atraves di PAR.