Kaya Artiko– Den e anochi i mardugá di 19 pa 20 di ougùstùs último, personal di e Unidat di Tráfiko den koperashon ku Koninklijke Marechaussee i bou di supervishon di Ministerio Públiko, a tene un kontròl riba uso di alkohòl den tráfiko riba Kaya Artiko.

 Un total di 108 shofùr mester a supla den e aparato ku ta registrá e kantidat di alkohòl konsumí. Ocho (8) shofùr a risibí un prosès verbal pa surpasá e límite di alkohòl pèrmití, mientras a kita reibeweis for di un (1) shofùr. Despues di e tèst, e 8 shofùrnan ku a risibí prosès verbal, por a sigui nan destino ku un Bob. Pues un shofùr sobrio ku ta manehá e vehíkulo pa nan.

E shofùrnan aki ku a haña un but, lo wòrdu di dagfar despues pa presentá den korte. Polis a hala atenshon di tur demas shofùr ku a konsumí alkohòl pero ku tabata bou di e límite pèrmití. Polis lo kontinuá ku e kontròlnan aki, ya ku uso di alkohòl tras di stür ta limitá e abilidat pa manehá un vehíkulo, ku tur konsekuensia ku esaki por trese kuné. E apelashon ta keda, pa si bo ta bai hasi uso di alkohòl, pa laga un shofùr sobrio kore pa bo òf hasi uso di medionan di transporte públiko, kaminda abo mes no mester fungi komo shofùr.