OFAC: Abogadonan di Global a entrega petishon ofisial pa Global risibi lisensia OFAC

ISLA—E kompania ku ta bai produsí asfalt riba tereno di isla, Global Oil Management Group (GOMG), mediante nan sukursal establesé na Kòrsou (CORT) a entrega un petishon ofisial na OFAC (Ofisina di Kontrolaria Aktivonan Internashonal) pa un lisensia.

E petishon ta enserá pa CORT, por risibi pèrmit di OFAC di por kuminsá importá krudo i òf produktonan petrolero for di Venezuela. Na e momentonan aki, Global tin un kontrakt di 5 aña firma ku Refineria di Kòrsou (RdK) i Curaçao Refinery Utilities (CRU). E kontrakt ta enserá uzo di fasilidat i servisionan di e dos kompanianan kontra di un pago di ménos di 2 mion florin mensual na RdK i CRU, repartí. Manera menshoná e petishon di Global ta pa kuminsá importá krudo for di Venezuela. E konsiderashon pa e pèrmit ta pa mehorá e kalidat di asfalt ku tin riba kareteranan na Estádos Unídos. Segun Global e krudo brutu di Venezuela ta mihó pa traha asfalt debí na su konstelashon. Estádos Unídos tin un skarsedat di asfalt i alabes tin mal kalidat di asfalt prinsipalmente den estadonan sùit di e pais.

Global a súplika pa risibi mesun pèrmit di OFAC komparabel na esun ku Chevron a risibi unda ta outorisá pa kumpra krudo na Venezuela. Chevron for di Yanüari 2023 a risibi outorisashon pa saka krudo for di Venezuela hiba Estádos Unídos.