CINEX: Jeanette Bonet di CINEX durante su diskurso ayera.

Sambil—Ayera den ouditorio di KONTENT[U] na Sambil, a inougurá e proyekto pa negoshantenan di Kòrsou por habri porta pa hasi negoshi na Medelllin. KONTENT[U] huntu ku su partnernan, CINEX, KVK, MEO, CTB i ACI Medellin ta tene dos dia di informashon presentá pa ekspertonan di ACI Medellin kendenan ta Carolina Acosta Jaramilo i Laura Morales Hiquita.

E ekspertonan den presentashon di invershon riba teritorio Antioquia, a yega Kòrsou ayera unda funshonarionan di CTB tabata spera nan miéntras servisio di Imigrashon a duna nan koperashon pa prosesá e yegada na Hato sin problema. ACI Medellin ta e agensia públiko sentral di invershon instituí pa gobièrnu di Colombia na Medellin.

Durante Mei último, dos representante di ACI tabata na Kòrsou riba invitashon di KONTENT[U] den kuadro di un transmishon via dje kanal Tele Medellin di Colombia. Na Mei último, KONTENT[U] a organisá un bishita pa alto funshonarionan di ACI, Bureau di Medellin, Alkaldia di Turismo bin konosé Kòrsou. E intenshon ta pa krea un balor agregá na e ruta nobo entre Medellin i Kòrsou, unda tin tres aéreoliña ta bulando e ruta semanalmente.

E bishita di ACI Medellin e biaha aki tambe ta riba invitashon di KONTENT[U] i su partnernan. Durante dos dia, e dos alto funshonarionan lo presentá posibilidatnan di hasi negoshi na Medellin i kon ACI por yuda komersiantenan lokal di ekspandé nan teritorio internashonal. E bishita alabes ta kuadra ku un kombenio firmá entre Medellin i Kòrsou pa stimulá komersio entre e dos teritorionan.

Tantu Carolina Jaramilo komo Laura Hiquita ta eksperenshá komo representantenan di Medellin den eksterior. Nan lo kubri nan presentashon prinsipalmente riba e terenonan komersial òf industrial ku Medellin tin nesesidat di sosionan internashonal. Nan presentashon ta kubri 8 área di komersio i lo enserá, Komersio General, BPO’s ku e.o. rankiamentu di krédito i kolekshon, Oudiovisual, Infrastruktura Hotelero, Siensia di Bida i Salubridat, Maneho i Operashon Logístiko, IT Sofwer, Fabrikashon i Eksportashon i finalmente desaroyo riba tereno di Video Games.

E tópikonan menshoná ta keda presentá den forma di sifranan makro ekonómiko i desaroyo  di Medellin. Tambe durante dos dianan benidero, ACI lo trata na dediká un tempu korto riba e transformashon di e siudat.  E programa ta enserá un apertura ofisial ayera. Pa djamars lo tin dos presentashon ku mesun kontenido. Finalmente pa djarason tin un presentashon den oranan di mainta kombiná ku posibilidat di enkuentro personal entre funshonarionan di ACI i partisipantenan.