E tim di PSI-Skuchami kende a duna splikashon amplio tokante salú mental durante un kalamidat.

Willemstad,– Den luna di aprel Gobièrnu den kolaborashon ku Sambil a tene un eksposishon di kalamidat den e sala prinsipal di Sambil kaminda PSI-Skuchami tambe a partisipá.

Durante e eksposishon den Sambil gobièrnu a enfatisá e proseso ku mester tuma lugá na momentu ku Kòrsou hañ’é den kalamidat. E evento a keda bon risibí bou di pueblo di Kòrsou, kaminda pueblo a risibí informashon di tur partido ku ta keda enkargá pa minimalisá efektonan devastador na momentu ku un kalamidat presentá. Partidonan ku a presentá tabata entre otro, Krus Kòrá, Curinde, KPC i asta e fundashon ku ta enfatisá salú mental PSI-Skuchami.

Segun Angelique La Cruz di PSI-Skuchami, e efektividat di e eksposishon tabata hopi bon. “Bo ta haña ku e informashon ta yega na un públiko grandi i ta bunita pa mira kon hopi hende no ta para ketu ku PSI-Skuchami tambe tin un ròl den kalamidat”. Segun La Cruz, PSI-Skuchami ta kai bou di ESF 6 kual ta e parti di salubridat durante un kalamidat.

E splikashon nan di Angelique La Cruz a bini dilanti durante un reunion ku parlamento. E reunion a tuma lugá riba 18 di ougùstùs i tabata tin komo tópiko “Presentashon di Fundashon Perspektiva i Sosten Integral-Skuchami (PSI-Skuchami) riba e tópiko, salú mental e pandemia silensioso”.