WILLEMSTAD,—-Di informashon ku Vigilante Farándula ta disponé di dje, ta indiká ku djasabra awor, e sala di fiesta situá den Sambil, ta bai keda estrená.

Ya for di siman pasá Vigilante Farándula a trese informashon ku pronto e sala di fiesta aki, lo bai habri su portanan. Miéntras tantu manera ku esaki a bira konosí den seno di e organisashon, mesora nos fuente a pone Vigilante Farándula na altura.

Lo bai ta un fiesta grandi pa ranka sali den e sitio menshoná. Un ke otro unda ku lo bai tin tantu agrupashonnan musikal, pero tambe otro artistanan popular ku lo bai presentá. Tambe ta asina ku e fiesta di djasabra awor, lo ta unu privá i ku ta personanan ku ta invitá so por drenta.

For di un otro kanal, esta un otro fuente, Vigilante Farándula a haña di komprendé ku e sitio nobo ta akapará mas o menos 1500 persona i ku nan èrko ta traha 100%. Pues no tin kuenta sintimentu di kalor. Esaki ta loke ku fuente a para fuerte riba dje, tur e dianan aki tin trabounan duru tumando lugá, pa asina djasabra awor ta gosadera ta bai tin.

Miéntras tantu ya tin diferente promotor, kende a bai buska mas informashon despues ku e artíkulo relashoná ku e sitio aki a keda publiká. Pues pa djasabra awor lo bai tin e promé fiesta den e sala di fiesta ku ta situá den Sambil.