WILLEMSTAD – Fundashon Perspektiva i Sosten Integral-Skuchami (PSI-Skuchami) lo duna un presentashon dia 25 di aprel próksimo pa 9’or di mainta, tokante loke nan ta yama e ‘pandemia silensioso’, salú mental.

A konvoká e reunion den Komishon Sentral riba petishon di miembronan di frakshon di PAR Zita Jesus-Leito, Ana Maria Pauletta i Steven Croes.

Presidente di Parlamento Charetti America-Francisca a stipulá e tempu pa papia riba e tópiko na un tanda di 10 minüt. Riba petishon di PAR ela invitá e instituto PSI-Skuchami, ku ta ofresé kuido ambulante pa salú mental. E Parlamentarionan a manda nan karta febrüari último p’e Presidente. Frakshon di PAR a mustra riba echo ku segun World Health Organization (WHO), salú mental despues di Covid-19 ta un parti di salú públiko ku nos no por bira kara mas p’e. Durante i despues di Covid-19 por a mira un subida drástiko di nesesidat di asistensia emoshonal, sikológiko i sosial. Organisashon, instituto i profeshonalnan di kuido a sinti e efekto akí di forma direkto, muchu mas kliente a yena na nan porta.

“Tambe komo pais nos por a tuma nota di e debilidatnan den e kadena di kuido mental. PSI-Skuchami, komo e instituto ku ta ofresé kuido ambulante pa salú mental, ta duna un vista amplio di e desaroyonan den nos komunidat. Salú mental ta sumamente importante pa kada persona. E ta afektá kon un hende ta prosesá informashon, tuma desishon i manehá bida en general. Miedu, hansha i inseguridat komo sentimentunan negativo a oumentá, ku tur e konsekuensianan ku esaki ta trese di dje. Komo pais nos por a mira e konsekuensia di esaki den diferente forma, entre otro den e subida di kasonan di violensia, abusu di alkohòl i depreshon.”

Anteriormente Parlamento a reuní den un asina yamá ‘vragenuur’ tokante e tópiko akí i Minister di Salubridat Públiko, Medio Ambiente i Naturalesa (GMN) Javier Silvania a enfatisá di lo ke un kolaborashon estrecho den e sektor di salú mental. Dia 24 di aprel 2019 Hunta di Ministernan a aprobá dokumento ‘Visiedocument Geestelijke Gezondheidszorg 2019-2023’ (VVGz), den kua entre otro ‘selfmanagement’ ta pará sentral. Segun Minister Silvania, ta trahando riba un plan di ehekushon dje dokumento. No por a hasié promé dor di pandemia. Durante lunanan akí e lo hiba kòmbersashonnan ku henter e sektor pa wak si mester aktualisá e dokumento. Ela a pone énfasis riba ‘tur’ stakeholder, inkluyendo PSI i Brasami.

Si e dokumento ta karga ku aprobashon ainda dje sektor, e lo prolongá esaki. Pero e no sa pa kuantu tempu ainda. E ke determiná tantu e kontenido komo e durashon huntu ku henter e sektor. E lo bishitá tur fundashon, papia ku direktornan tokante nan situashon finansiero i problemanan. E lo sinta tambe ku trahadónan pa haña informashon. Tur esaki ku e meta pa haña bista real dje situashon finansiero, p’e informá Parlamento. Silvania lo traha huntu ku e instansianan den e sektor di salú mental riba solushon.