Tim di investigashon: Dr. Izzy Gerstenbluth, Dr. Tineke Alberts, Dr. Merel Griffith en Drs. Elly Hellings.

Willemstad—Mental Health Caribbean (MHC) i GGz Curaçao a tuma e inisiativa pa huntu investigá kon e Kuido pa Salú Mental (GGZ) na Kòrsou i Bonèiru por konektá mihó na e deseo i nesesidatnan di hendenan  den mester di yudansa mental riba e islanan akí.

Komo isla chikí, no ta fásil pa ofresé kuido adekuá fásil alkansabel i spesialisá na tur kliente. Na Kòrsou tin listanan di espera largu i e kolaborashon entre instanshanan no ta optimal, kual ta pone ku hendenan ku kehonan mental no ta haña e yudansa ku nan mester na tempu. Bonèru no tin un klínika, ku konsekuensia ku mester manda hendenan ku mester di hospitalisashon Kòrsou, kaminda nan ta haña nan mes den un ambiente deskonosí sin sosten di famia. Ku e investigashon, MHC i GGz Curaçao ke wak den kombersashon ku institutonan di kuido, dòkternan di kas i otro partidonan ku ta referí, pashènt i esnan yegá na nan, kua mehorashonnan ta posibel.

Tantu MHC komo GGz Curaçao no tin investigadó den nan organisashon i p’esei a pidi Curaçao Biomedical Health & Research Institute (CBHRI) pa nan kapasidat di investigashon. CBHRI den añanan tras di lomba a para fuerte pa mas investigashon kalitativo i di akshon riba e islanan. CBHRI a prepará  huntu ku MHC i GGz Curaçao, un proposishon pa investigashon i a pidi supsidio pa esaki serka  ZonMW, un organisashon hulandes ku ta finansiá investigashon riba enkargo di VWS (ministerio di salubridat públiko, bienestar i deporte) i e Nederlands Wetenschappelijk Onderzoeksinstituut. A akordá e petishon pa investigashon i a honr’é ku un montante di supsidio di kasi 200.000 Euro.

Ehekushon di e investigashon a kuminsa kana na febrüari 2023 i lo tuma dos aña. Den e periodo di investigashon lo kolektá informashon na diferente manera. Bou di un grupo di dòkter di kas ta investigá kuantu hende ta mèldu ku kehonan mental, ki tipo di keho nan tin, ki nesesidat di kuido nan tin i kon nan ta evaluá e kuido ku nan ta risibí. Ku e informashon akí ta posibel haña un bista riba e demanda i nesesidat di hendenan den un mester mental. Tambe lo tuma lugá kombersashonnan ku klientenan i esnan yegá na nan. Ademas lo inventarisá kua ta e institutonan ku na e momentunan akí ta ofresé un forma di kuido pa salú mental na ámbos isla. Dor di kompará e demanda i nesesidat di klientenan i esnan yegá na nan ku e oferta di kuido aktual, por wak te kon leu esakinan ta kuadra ku otro, kiko ta bai bon, kiko ta falta i kiko por mihó. Aparte di amplia konosementu tokante e situashon aktual i nesesidat den área di kuido pa salú mental, lo wak tambe di ki forma por mehorá e kolaborashon entre e islanan, institutonan, i klientenan.