Firma: Minister Interino di Salubridat Públiko Javier Silvania i presidente di Asosashon Médikonan di Kas, Jerry Semper ta mustra e karta di kompromiso ku nan a firma djasabra último na Pietermaai.

Pietermaai—Pa mas tardá 29 di mart próksimo, Ministerio di Salubridat Públiko ke pa pasa un desishon den Hunta di Minister pa instalá un pòst di warda pa Médikonan di Kas. Segun un kompromiso firmá entre presidente di e asosashon médikonan di kas, Jerry Semper i minister interino na GMN, Javier Silvania, e pòst lo keda ubika na CMC, hospital nobo.

For di 2013, médikonan di kas ta tratando na yega na un solushon ofishal despues di hopi aña anterior ta diskutiendo. Siman pasá e médikonan a tene mitar dia pa “pone trabou abou” unda a bai reuní na Bon Bini Center riba Schottegatweg. Einan a keda kumbiní ku gobièrnu mester yega na un solushon promé ku 4 aprel, sino e médikonan ta stòp di kore warda i tur pashènt mester bai CMC. Segun un karta di kompromiso 11 di mart último, partidonan a kumbiní ku entrante 1 di yanüari 2024, Kòrsou lo tin un HAP na CMC.