Piscaderaweg — Fundashon Leading with Integrity (LWI) a entregá sertifikado n’e promé tres studiantenan kende a gradua na su School of Integrity. Entrega di e sertifikadonan a tuma lugá dia 19 di desèmber último durante un seremonia ameno na WTC.

Durante e seremonia, minister Konket a hiba palabra i a elogiá e inisiativa di LWI pa lanta un skol di integridat, kual ta kuadra masha bon ku e maneho di gobièrnu relatá na Büró di Integridat. Na su turno, Dr. Marlon Winedt tambe a duna un diskurso kòrtiku den kual el a enfatisá ku integridat ta masha importante pa protehá nos komunidat kontra inhustisia i ku ademas integridat ta hiba na un mihó komportashon i prestashon en general, tantu den trabou komo den bida personal.

Fundashon LWI ta un organisashon non-profit ku ya pa 6 aña tin e meta di eduká lidernan den komunidat den e área di integridat, pa nan por inspirá nan siguidónan pa biba un bida íntegro. LWI ta enfoká riba e integridat di paden (integridat intrínsiko), enfatisando moralidat eksplísitamente.

E kurso di Integridat Básiko a dura ocho siman i e lèsnan a ser duná na un manera interaktivo den grupo chikitu. Komo parti di e kurso kada studiante mester a skirbi un tésis tambe na final.  Pa medio di e kursonan akí, LWI ke duna su aporte na nos komunidat, konsiderando e nesesidat pa mas integridat den nos pais. E siguiente kurso di Integridat Básiko lo kuminsá na mart 2021, i e kurso di Integridat Avansá ta kuminsá na luna di ougùstùs 2021. E idioma di instrukshon lo ta Papiamentu. Hulandes òf Ingles tambe ta posibel, si tin interes di mínimo 10 persona. 

Kosto i inskripshon

Kosto di kada kurso ta ANG 435, ku ta inkluí gastu di material di estudio (buki). Tin posibilidat tambe pa drenta areglo di pago. Pa inskripshon, por bai riba wèpsait www.lwi-foundation.org/soi. Pa haña kontesta riba kualke pregunta, por tuma kontakto ku LWI via email ([email protected]) òf yama na tel. 516-9747 òf 789-3098.