Tabata den aria di SDKK mes a logra di detené tres di e indokumentadonan.
Willemstad— Ayera den oranan di atardi personal di Prizon huntu ku personal di vigilansha di un kompania priva i tambe Polis tabatin un búskeda formal rondó di Prizon i tambe den e bario di Koraal Specht pa 5 indokumentado ku a logra di hui for di barak.
E personal di e kompania di vigilansha priva ku tin e tarea pa vigilá e indokumentadonan ku ta detené den Barak na dado momento a ripara ku falta sigur sinku Venezolano. Ta trata aki di latinonan ku djarason último a ser detené riba un boto tipo yola na altura di Klein Kòrsou despues di a trata di drenta nos Pais di un forma ilegal. Tabata trata di 24 ilegal di kual 9 tabata hende muhé i 1 yu di 2 aña. Mesora e personal di vigilansha a bati alarma kual a pone ku e personal di Prizon mesora a drenta akshon pa kuminsá ku e búskeda. A bin sali na kla ku e indokumentadonan aki a logra di forsa e waya ku tin rondó di e barak pa asina por a resultá den e kura pa despues a bula e waya i resultá pafó di SDKK. Mesora despues ku a bira konosí di e huida a kuminsá ku un búskeda i tabata den e aria di Koraal Specht mes a logra di detené tres di e indokumentadonan aki. Miéntras dos di nan ainda ta fugitivo. Kuerpo polisial lo kontinuá ku e búskeda miéntras den SDKK mes lo hasi mas investigashon pa asina saka afó kon e huida por a tuma lugá dje fásil ei.