Gastunan operashon pa mantenshon di e roinan aktual lo kosta Kòrsou 985 mil florin. Apesar di e suma aki, por nota ku ainda Kòrsou tin problema na momentu ku áwaseru kai.

Punda,– Den e promé konsepto di presupuesto 2024 por nota ku ministerio di VVRP a presupuestá 985 mil florin na gastunan operashon pa entre otro mantenshon di sistemanan di roi.

Un di e mishon nan prinsipal di Ministerio di VVRP ta pa ehekutá protekshon konfiabel di komunikdat kontra di temporada di wer peligroso. For di e kapítulo di ministerio di VVRP por nota ku e ministerio konosé ku un maneho korekto di awaseru i awa di fekalia ta esensial pa sostené un bida sostenibel den nos ambiente. Mas aleu e ta nesesario pa mantené un tera i un ambiente limpi i pa garantisá nos rekursonan natural i pa mantené e biodiversidat.

Ta pa motibu aki, tambe na 2024 lo invertí den un maneho efektivo di awa. Esaki ta nifiká ku den e aña aki tambe lo sigui traha riba instalashonnan di sistema di drenahe, tantu pipanan komo puntonan di kòntròl, instalashon di konekshonnan di kas na e sistema di drenahe i tambe lo traha riba mantenshon atrasá. Tambe lo traha riba sistema di eliminashon di awa i instalashonnan di purifikashon di awa. Pa ekeutá e proyektonan lo kontratá ekspertonan i, konforme nesesidat, lo instalá aparatonan adekuá pa ehekutá inspekshon.

Ta asina ku pa e aspekto di sistema di riolering i purifikashon di awa, ministerio di VVRP a presupuestá den e promé konsepto di e presupuesto ku e gastunan operashonal(gewone dienst) lo ta 5.9 mion florin. E aspekto di riolering i purifikashon di awa ta inkluí trabounan relatá na kuido pa kolekshon adekuá , transporte i purifikashon di awa di fekalika i suministrá e proseso di purifiká pa reusá awa di fekalia. Tambe otro trabounan operashonal ta inkluí, kuido pa un sistema adekuá di drenahe.