Scarborough,- Tobage Emergency Management Agency (TEMA), a duna di konosé ku nan a risibí un notifikashon kaminda 15 kurpa a keda diskubrí riba un boto den awanan di Trinidad & Tobago. E kurpanan tabata den fase di deskomposishon na momentu ku e boto a keda diskubrí.
Den e promé anunsio, TEMA a duna di konosé ku ta trata di 13 kurpa, pero despues di mihó investigashon esaki a keda ahustá na 14 kurpa sin bida. Den e anunsio TEMA a duna di konosé ku ainda nan no sa kon e persona nan a bin fayesé, pero por tuma nota si ku e boto tabata tin basta tempu riba laman.
Mesora outoridatnan a manda e kurpanan na un mortuario den e kapital di Tobago. Segun investigashon ta trata 14 hòmber ku yas bèrdè bistí. Ademas investigadónan a duna di konosé ku tur hòmber tin rasa Afrikano.
Polis na Tobago a konfirmá e suseso aki despues ku ta un piskadó a tou e boto trese na kantu pa outoridatnan por investigá. Boto a keda diskubrí 4 mia for di kosta di Tobago den oranan di mainta.
Un di e piskadónan a duna di konosé ku ta su kolega piskadó a bèl e i bisé ku el a diskubrí un boto ku piská rondoná di dje. E piskadó ku a bèl a bisa ku e boto tin un holó straño pues e ta sospechá di tin kadaver aden. Mesora e piskadónan a tuma kontakto ku Coast Guard, pero Coast Guard no tabata tin un boto ku por a bai asina leu pues úniko solushon tabata pa e piskadó bai kantu ku e boto. Debí na e holó e piskadó no a drenta den e boto.
Na Febrüari Guyana a pidi Trinidad & Tobago pa yuda buska e boto debí ku diferente persona a wak e boto en kuestion kaba. Outoridat di Guyana ta sospechá kue boto por a asta bin for di Afrika.