Willemstad – Manera ya ta konosí, Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas a pone komo prioridat pa drecha, renobá i instalá fasilidatnan na vários playa públiko na benefisio di bishitantenan lokal i turista. Na Caracasbaai durante e fin di siman ku a pasa a instalá e “drijflijnen” ku ta separá área di landamentu i trafikashon marítimo. Instalashon di e “drijflijnen” tabata un operashon basta grandi ku kolaborashon di bushinan i kolaboradónan di AVB (ántes LVV).

E snèk na playa di Daaibooi tambe tabata warda basta tempu pa haña mantenshon. E dak tabata den un situashon hopi deplorabel i Minister Pisas a duna atenshon na e situashon aki tambe i inisiá trabounan di mantenshon di e dak. Ya kaba a baha e dak ku tabata kibrá i a kuminsá ku instalashon di un dak nobo. Minister Pisas lo sigi kumpli pa pone nos playanan den bon estado i sigur pa asina pueblo i turistanan por sigi hasi uzo di nos bunita playanan. Riba potrètnan por mira instalashon di e “drijflijnen” na Caracasbaai i renobashon di e dak di e snèk na Daaibooi.