Piskanan djindja ku por venená un turtuga.

Willemstad, — Sea Turtle Conservation Curaçao a kue un turtuga malu na playa Sta. Cruz i esaki a wòrdu hiba veterinario pa rekuperá.

Ard Vreudenhill di Sea Turtle Conservation Curaçao ta duna un update di e situashon di turtuganan i ta bisa ku a haña un turtuga malu na Sta Cruz i esaki awor ta na veterinaria i ta rekuperando. Ta kere ku por pone e turtuga bèk den awa fin di siman. A kontrolá e playanan i hopi sambuyado tabata yuda tambe pa asina detektá bestianan malu pa asina alertá Sea Turtle Conservation Curacao. Ard Vreugdenhill ta bisa ku a bai Klein Curaçao ayera dia 2 aprel i a weta ku e awa ta limpi, no tin piska morto i tampoko tin turtuga landando di un forma straño den laman. Kompará ku aña pasa e situashon ta hopi mas mió Ard Vreugdenhill ta bisa.

Aña pasá e situashon di turtuganan ku ta kome e piska venenoso djindja a tuma lugá tantu na Kòrsou komo na Boneiru. Ku e turtuganan ta kome e piska djindja aki ta sosodé hopi den lunanan di mart i aprel Vreugdenhill ta komentá. Pero por bisa ku e aña aki e situashon ta hopi mas mió pa e turtuganan kompará ku un aña pasa.  Sea Turtle Conservation Curacao lo keda alertá pa asina tin kòntròl riba lokual ta pasa den laman ku turtuganan, Vreugdenhill ta bisa. Pues ta asina ku algun siman, diferente organisashon a alertá pa ku e situashon di turtuganan. Ta asina ku turtuga ta yuda limpia laman pero esakinan ta kore peliger di kome e piskánan venenoso yamá djindja.

Djindja tin e kapasidat pa mata diferente bestia di laman ku ta kome esaki. Ora e turtuganan venená landa bou di awa nan ta mustra mané mariá i pues esaki ta splika dikon nan ta landa straño. Nan tin problema pa hala rosea bou di awa, i p’esei mester kue nan paso si no nan ta muri, Ard Vreugdenhil a splika anteriormente. E venenu por sali for di e turtuga pero pa hasi esaki mester neutralisá e turtuganan ku karbon aktivo i e veterinaria di e Sea Turtle Conservation Curaçao ta yuda ku esaki, Ard Vreugdenhill ta bisa. 

A haña informashon di turtuganan malu aki na Kòrsou i na Boneiru tin tambe un par di turtuganan malu. Vreugdenhill ta duna un update di un turtuga ku a wòrdu kohé últimamente na Sta. Cruz i esaki ta rekuperando. Sambuyadónan i tambe piskadónan a yuda pa asina alertá Sea Turtle Conservation Curaçao. Por yama Sea Turtle Conservation Curaçao via number  +5999 664 7970 pa asina e organisashon por bini i yuda kue turtuganan malu for di awa.