Back to Top
Responsive image
E korant di pueblo

A lansa wèpsait di Curaçao health app


October 12, 2021 • 2 minüt pa lesa

Riba wèpsait di www.curacaohealthapp.com personanan bakuná por apliká pa sertifikado digital di Covid-19.

PUNDA – Ayera alrededor di 11’or di mainta, Gobièrnu di Kòrsou a lansa wèpsait pa yega na un prueba digital di bakunashon. Esaki a sosodé despues ku djabièrnè promé minister di Kòrsou a duna di konosé ku Kòrsou tambe lo hasi uso di un QR-code komo komprobante di bakunashon.

Manera a keda anunsiá siman pasá durante rueda di prensa e wèpsait kaminda tur siudadano di Kòrsou por apliká pa un sertifikado digital di Covid-19 a keda lansá ayera. Lansamentu di e wèpsait ta e promé fase den e proseso pa yega na un aplikashon digital pa iOS i Android smartphones kaminda tambe lo por pidi i mustra e prueba digital. Aplikashon pa e sertifikado digital di Covid-19 den forma di un QR-code, ta posibel riba e wèpsait www.curacaohealthapp.com . Ta importante pa tuma na nota ku tur persona ku ke apliká mester tin un karchi di bakunashon bálido pa por kontinuá ku e proseso. Ademas, por lo pronto personanan kompletamente bakuná so ta bini na remarke pa apliká pa e sertifikado digital. 

Segun publikashon di Gobièrnu e komprobante digital aki por keda usá dor di personanan ku ta biaha di Kòrsou pa Oropa. E prueba digital, yamá Digital Covid Certification (DCC), ta un manera aseptá i fásil pa por kontrolá si un persona ta bakuná òf no. Na Hulanda i diferente otro pais na Oropa, e prueba digital ta sirbi komo komprobante pa por drenta lugánan públiko manera restorant, teatro i otro eventonan sosial públiko. Banda di e opshon pa ‘download’ e QR-code riba telefon, tambe ta posibel pa ‘print’ un prueba di e QR-code riba papel pa esnan ku no tin telefon digital. Sinembargo, Gobièrnu ta rekomendá pa pidi e prueba via di e wèpsait sigur 48 ora promé ku mester biaha.

Banda di uso di e sertifikado digital komo prueba pa biaha na Oropa, riba término kòrtiku Kòrsou tambe lo bai usa e DCC lokal pa kontrolá pasaheronan ku ta bini Kòrsou for di Oropa. Ademas, e periodo aki lo keda usá pa hasi e último trámitenan pa por hasi uso di e DCC lokal, entre otro na eventonan farandulero i deportivo kaminda mas ku 100 hende ta aglomerá. Den e próksimo simannan Gobièrnu di Kòrsou lo duna mas informashon tokante uso di e prueba digital i kon pa yega na dje.

Login