Willemstad,– Den 2023 ainda leinan lokal ta pèrmití diskriminashon. Den e kaso aki leinan di pais Kòrsou ta pèrmití ku e hóben bou di 22 aña ta risibí un salario mas abou ku e salario mínimo di Naf 10,70 pa ora.

Na dezèmber 2022 minister di SOAW, Ruthmilda Larmonie-Cecilia a indiká ku entrante 1 di yanüari 2023 e salario mínimo ta oumentá. E salario mínimo a oumentá ku 1 florin i 8 sèn pa ora. Esaki ta nifiká ku for di 1 di yanüari 2023 un trahadó ku ta gana sueldo mínimo mester kobra por mínimo 10 florin i 70 sèn pa ora. Basá riba e kantidat di ora pa trabou pa siman e salario mínimo lo varia entre 1853,24 florin pa luna pa 2223,89 pa un persona ku ta traha 48 ora pa siman.

Den e mesun rueda di prensa na dezèmber 2022 e minister a splika tambe ku e ta trahando pa kita e sueldo mínimo pa hubentut kual ta 25% ménos ku e sueldo mínimo pa adulto. Aktualmente lei ta stipulá ku tur persona entre e edat di 18 pa 21 aña ta kobra 75% pa 90% di e sueldo mínimo ku ta na vigor.

Apesar di e trabounan dje minister pa kita e sueldo mínimo hubenil, ainda e resultadonan deseá no a keda lográ. Ya kaba ta drentando den di 9 luna di aña kaminda hóben nan entre 18 aña pa 21 aña ta wardando riba e minister.

Un representante di e minister a indiká ku e proposishon ya ta riba mesa pero no tin un fecha ainda ku e proposishon ta drenta na vigor. E proposishon ta inkluí entre otro ku hóben nan lo gana mesun salario mínimo ku kualke adulto.

Na mart 2023 partido KEM a emití un komunikado pa aselerá e proseso pa adaptá e lei di sueldo mínimo pa hubentut. Segun e komunikado Enseñansa obligatorio ta aprobá na 18 aña di edat i ta hustu pa suèldu mínimo wòrdu ahustá igual na e edat di 18 aña òf mas. Tur esaki ta tuma lugá ainda,  apesar ku presonan for di 18 aña di edat ta partisipá kompletu riba merkado laboral. E pago NO ta igual konforme e ponensia trabou igual, pago igual. Aktualmente hóbennan di 18-20 aña di edat ta risibí 25% ménos di pago, pa trabou igual ku esnan ku tin 21 aña di edat òf mas! Esaki ta inhustu i ta demotivá e hóbennan aki, pa drenta i partisipá den/riba merkado di trabou.