Oumento di salario mínimo ta trese efekto direkto i indirekto pa ekonomia di Kòrsou, pero esakinan lo ta mínimo segun e ‘Ministeriele regeling’ ku a keda publiká dor di minister Larmonie-Cecilia.

Willemstad, — E oumento di salario ta resultá den un pèrdida di impuesto di balor di NAf. 6.5 pa 9.5 mion. Esaki a keda publiká den e lei nobo di salario.

Segun e publikashon den kual desishon di minister Larmonie- Cecilia huntu ku minister-presidente Pisas a keda tumá a dediká un paragraf na e efektonan finansiero di e oumento di salario mínimo. Den esaki a menshoná e efektonan direkto I indirekto riba e entradanan di gobièrnu. Segun informashon, gobièrnu ta na altura ku e oumento di e kostonan di personal, por influenshá ganashi di empresanan i esaki na su turno tambe tin efekto riba impuesto di ganashi kual tambe lo ta ménos.

E lei ku a keda publiká ta indiká ku un oumento di kostonan di NAf. 43 mion komo konsekuensia di oumento di salario mínimo, lo resultá den un pèrdida di impuesto di 15% pa 20 porshento, kual ta un suma di NAf. 6.5 mion te ku NAf. 9.5 mion. Segun e ‘Ministeriele regeling’ ku a keda publiká dor di minister SOAW, e proyekshon ku empleadonan lo wòrdu despidí komo konsekuensia di e subida den salario mínimo, lo ta mínimo, ya komo ta proyektá ku empleo no lo baha debí na e oumento di e salario mínimo.

Vereniging Bedrijfsleven Curacao (VBC) ku ta sali na defensa di empresanan aki na Kòrsou, a kompartí nan perspektiva pa loke ta trata e subida di e salario mínimo. Den esaki VBC a kompartí nan preokupashon pa loke ta trata e subida aki. Segun VBC defisiensianan den e banda di oferta di ekonomia, pues tur lokual empresanan ta ofresé na benta di produkto i servisio, no por keda resolvé dor di duna sosten finansiero na kumpradónan di produktonan i servisionan.

VBC a indiká ku e echo ku ta sostené e kumpradó tin komo konsekuensia ku ta stimulá demanda, miéntras ku oferta den su totalidat ta keda atras.  VBC ta splika ku teoria ekonómiko ta mustra ku den e kaso den kual ta sostené e kumpradó, preisnan ta keda subi ya komo kostonan di personal pa diferente empresa ta bira mas karu. Esaki no ta atraktivo pa e konsumidó ni tampoko diferente sektor di ekonomia di pais Kòrsou, spesialmente e sektor turístiko, segun VBC ta splika.