UTRECHT—Sindikato FNV ta haña eskandaloso ku partido BBB a vota kontra oumento di salario minimo den Eerste Kamer.

E promesanan di mas seguridat sosial manera primintí den kampaña no tin balides, segun visepresidente di FNV Boufangacha. E ta papia di weganan di koalishon. BBB a anunsia e siman aki ku lo e vota kontra e ekstra oumento di salario minimo den Eerste Kamer. Asina e mayoria pa e lei a disparse. FNV ta hopi desepshoná. Segun e sindikato esaki ta nifiká ku hendenan ku salario hopi abou no ta bai haña nada ekstra. E ta nifiká tambe ku e plaka ku famianan por a gasta na kombustibel, ta bai pa kompanianan haña mas ganashi. Segun e sinfikato no tin un motibu legitimo ku den un pais ku ta birando mas riku, esnan ku salario minimo i menos pudiente no por benefisia di e kresementu. FNV ta di opinion ku doñonan di trabou por paga e oumento. Pa kompanianan grandi kaminda tin mayoria trahadó ku sueldo minimo, e oumento ta kosta 0.04% di nan ganashi, den sektor mediano 0.07%. Organisashonnan di doño trabou VNO-NCW, MKB-Nederland ta keda para riba nan posishon ku no ta bon idea pa subi sueldo minimo, pasobra den ultimo aña i mei e sueldo minimo a subi kaba konsiderablemente. Esaki ta un problema kaba pa hopi kompania. Baha e preshon di prima ku belasting ta un medida mas efektivo segun kompanianan. Otro sindikatonan tambe ta desepshona ku e oumento no a pasa den Eerste Kamer.