E salario mínimo ta stipulá na Naf 11,28 pa ora. Pero e salario mínimo pa hóben nan entre 18 pa 20 aña ta wòrdu redusí entre 25% pa 10%. 

Willemstad,– Na e momentunan aki nos leinan lokal ku ta determiná un salario mínimo ta indiká ku tur persona mas bieu ku 21 aña tin derechi pa traha pa un salario mínimo ku ta keda stipulá den lei. E salario mínimo aktualmente pa personanan riba 21 aña a oumentá ku 5.4% den 2024. Kaminda e salario mínimo tabata na Naf 10,70 pa 2023, awor ta bira Naf 11,28 bruto pa 2024.

Durante un rueda di prensa na dezèmber 2022, minister di SOAW, Ruthmilda Larmonie-Cecilia, a splika ku den su maneho su ministerio ta investigando pa trata na eliminá e echo ku adultonan entre 18 pa 20 aña ta ganando un sueldo mínimo redusí. Aktualmente lei ta stipulá ku tur persona entre e edat di 18 pa 21 aña ta kobra 75% pa 90% di e sueldo mínimo ku ta na vigor. Pues den 2024 un adulto di 18 aña ta gana solamente Naf 8,46 pa ora. Sinembargo, e salario mínimo pa un adulto di 18 aña ta solamente 20 sèn mas haltu ku e sueldo mínimo di 2016 pa adultonan riba 21 aña.

Apesar di e trabounan dje minister pa kita e sueldo mínimo hubenil, ainda e resultadonan deseá no a keda lográ. Na sèptèmber un representante di e minister a indiká ku e proposishon ya ta riba mesa pero no tin un fecha ainda ku e proposishon ta drenta na vigor. E proposishon ta inkluí entre otro ku hóben nan lo gana mesun salario mínimo ku kualke adulto riba 21 aña di edat.

E proposishon ya kaba a bai pa parlamento, kaminda parlamento ta pendiente tratamentu di e leinan nobo. E leinan relashoná ku salario mínimo a keda desaroyá den añanan 1970.  E rason pakiko e lei a dikta un salario mínimo mas abou pa adultonan hóben tabata pa baha e drèmpel pa empresarionan duna hóben nana adulto trabou ku no tabata tin eksperensha ainda den e merkado laboral.

Alabes mester remarká ku partido KEM a emití un komunikado splikando nan prekupashon tokante un salario mínimo redusí pa hóben adulto. Segun e komunikado enseñansa obligatorio ta aprobá na 18 aña di edat i ta hustu pa suèldu mínimo wòrdu ahustá igual na e edat di 18 aña òf mas. E salario mínimo redusí ta tuma lugá ainda,  apesar ku presonan for di 18 aña di edat ta partisipá kompletu riba merkado laboral. E pago NO ta igual konforme e ponensia trabou igual, pago igual.

No ta konosí ainda ki efekto eliminashon di e salario mínimo redusí tin pa e forsa laboral di adultonan entre 18 aña pa 20 aña. Komo ku e demografia aki a kaba di drenta den e merkado laboral, chèns ta chikí ku nan tin kòntrakt di trabou ‘vast’. Pues akaso kuminsá tene e mesun salario mínimo ku adultonan riba 21 aña, esaki por nifiká ku kompanianan lo kita e hóben nan adulto muchu mas fásil komo ku e oumento di gastunan no ta rendabel mas pa e trabounan di e hóben nan adulto sin eksperensha laboral.