WILLEMSTAD – Firmando e dokumentunan pa finansiamentu pa e di kuater parke di mulina di bientu nèt promé ku e aña a bòltu, e fondo di penshun general APC ta kontribuí supstansialmente na e esfuersonan ku NuCapital ta desplegando pa dékadanan kaba pa energia mas duradero na Kòrsou. Gradualmente e parke nobo di bientu ta bai lanta na kosta nort na altura di Koraal Tabak.

Dia 28 di desèmber último señora Evelyn Kruithof-Bor komo direktor di APC i señor Roy Kolader komo direktor di NuKoraal Tabak Windparken a firma e dokumentunan ku ta forma e base pa finansiamentu di e parke nobo di bientu den tapara. NuKoraal Tabak Windparken ta un joint-venture entre NuCapital i Aspiravi for di for di Bélgika. Ambos partner tin hopi eksperiensia ku desaroyo di parke di mulina pa energia mas bèrdè i mas limpi. Ya anteriormente NuCapital a desaroyá tambe tres parke di mulina di bientu na Kòrsou, esta Tera Kòrá I, Tera Kòrá II i Playa Canoa.

E parke nobo di bientu aki na kaminda ta rekerí un invershon di alrededor di US$ 60 mion (ANG. 110 mion). E partner APC ta finansiá e kapital prestá na balor di US$ 48 mion. Señora Kruithof-Bor a deklará di ta orguyoso ku APC pa medio di e konvenio aki komo partner di NuKoraal Tabak Windparken B.V. ta forma parti di e transishon ku Kòrsou ta bai pasa aden pa mas i mas energia duradero. Pa e gobièrnu lokal e transishon  aki di energia na su debido tempu lo nifiká ku ta ekonomisá na balor di bastante mion dòler ku no tin nodi gasta mas na importashon di kombustibel fósil, miéntras na mes momento lo redusí e emishon di gasnan tóksiko.

Na nòmber di NuKoraal Tabak Windparken señor Kolader tabata kontentu ku e echo ku pa finansiamentu di e proyekto spesífiko aki nan por ta den kompania di un partner konfiabel manera APC. Segun Hurdle ‘Trip’ Lea i Roy Kolader, managing directors di NuCapital, e proyekto aki ta un paso nobo den e aspirashon pa no solamente na Kòrsou mes, pero tambe mas ámplio den e region di Karibe i Latino Amérika boga pa desaroyo di proyektonan di energia duradero ku en bista di e kambionan di klima ta bira kada dia mas nesesario.