Apesar di ku Aqualectra a satisfasé pueblo ku e demanda amplio, e empresa ta sigui enfatisá ku ta importante pa usa koriente konsiente.

Willemstad,– Aqualectra mester a lidia ku un demanda máksimo di koriente djaluna último i por a hasi esaki sin esfuerso. E demanda a alkansá e máksimo di 142,7 megawòt den kareda di 10’or anochi, kual ta algu históriko. Esaki a superá e demanda rèkòrt ku tabatin anterior di 138,8 megawòt kual a keda registrá dia 5 di sèptèmber aña pasa.

Apesar di e kondishonnan difísil, Aqualectra a logra tòg pa duna hinter komunidat koriente, pa asina tur hende por a pasa nan anochi kómodo. Den e último dianan e bientu tabata limitá, pa kual e molinanan di bientu a produsí ménos koriente. Djaluna e molinanan a aportá ku solamente 19,7 megawòt for di un demanda total di 143,7.

Segun e pronóstiko aktual di Meteo, den e próksimo anochinan e kalor lo kontinuá kompaña pa un bientu suak. Danki na un programa di mantenshon intensivo di Aqualectra i e koperashon di Curacao Refinery Utilities (CRU) pa e suministro di koriente, ku tin sufisiente kapasidat pa suministrá koriente pa e isla durante e demanda rèkòrt.

Apesar di ku Aqualectra a satisfasé pueblo ku e demanda amplio, e empresa ta sigui enfatisá ku ta importante pa usa koriente konsiente. “Redusí e uso innesesario di koriente pa asina kontribuí na e stabilidat si e suministro di koriente i e preservashon di e sostenibilidat”, asina Aqualectra ta afirmá.