Willemstad/Philipsburg – Banco di Caribe N.V. (‘Banco di Caribe’) lo ser bendí ku United Group Holdings B.V. (‘United’). E benta lo inkluí tur aktividat bankario di Banco di Caribe na Kòrsou, Aruba, Boneiru i Sint Maarten, komo tambe e aktividatnan di seguro i invershon di Van der Lubbe Assurantiën N.V., Bancarib Real Insurance Curaçao N.V. i BdC Investments B.V. E akuerdo di benta a keda firmá dia 11 di sèptèmber 2021 pa e bendedó, ku ta Ennia Caribe Holding N.V. (‘ECH’), representá pa Centrale Bank van Curaçao en Sint Maarten (‘CBCS’) i di otro banda pa e kumpradó, United. ECH ta e empresa matris di grupo Ennia. United ta un empresa di servisio finansiero rekonosí, aktivo entre otro na Kòrsou i na seis diferente pais europeo, inkluso na sentronan finansiero manera Amsterdam, Londres i Luxemburg.

Banco di Caribe
Banco di Caribe ta un institushon importante den e parti karibense di Reino. Atkisishon di Banco di Caribe di parti di United ta kontribuí na konsolidashon di e panorama bankario na Kòrsou. Pa BdC, United lo nifiká un akshonista finansieramente sólido i un partner ku sentido di kompromiso ku lo permití e banko akí implementá su strategia di kresementu i invertí den un servisio finansiero óptimo na Aruba, Boneiru, Kòrsou i Sint Maarten.

Rekuperashon finansiero di grupo Ennia
ECH i United ta spera di finalisá benta di Banco di Caribe den e di kuater kuartal di e aña akí. Lei ta eksigí un evaluashon regulatorio i, komo kondishon pa e benta, e evaluashon ei mester ser kompletá satisfaktoriamente promé. Benta di Banco di Caribe ku United ta un paso importante den e proseso di rekuperashon finansiero di grupo Ennia. Pago di e benta lo sosodé kompletamente na efektivo i lo ta na disposishon di ENNIA Caribe Leven N.V. inmediatamente. Esei lo kontribuí na baha e kompania akí su perfil di riesgo i optimalisá su portafolio di invershon, na benefisio di su doñonan di pólisa. Fuera di esei, unabes ku e benta ta tras di lomba, grupo Ennia lo por bai konsentrá kompletamente riba nan aktividatnan riba tereno di seguro.