AMSTERDAM—Despues di pidi diskulpa pa su ròl den pasado sklabitut, banko sentral hulandes DNB ta despositá 5 mion euro den e fondo spesial di sklabitut.

E fondo spesial ta pa inisiativanan lokal ku ta kontribuí na mehorashon di kondishonnan di bida di desendientenan di katibunan. Den esaki DNB ta traha den koperashon ku Prins Bernhard Cultuurfonds, ku den proksimo añanan lo evaluá e petishonnan. E promé petishonnan a keda entregá i aprobá kaba. Ta trata di plaka pa konstrukshon di e museo nashonal di sklabitut na Amsterdam, Elisabeth Samson Huis na Surnam i e museo di Tula na Kòrsou. Den 2022 presidente di DNB Klaas Knot a pidi diskulpa pa e ròl ku e banko a hunga den pasado sklabitut durante e konmemorashon nashonal di abolishon di sklabitut na Amsterdam. Den un deklarashon DNB a bisa ku for di 2022 a papia ampliamente ku desendientenan, organisashonnan i akademikonan kon banko sentral por yuda den konsientisashon i redukshon di e impakto di pasado sklabitut. Anteriormente ABN Amro tambe a pidi diskulpa pa ròl di e presesesornan di e banko. ABN no kier a bai mas leu ku pidi diskulpa. Direktor Swaak a primintí ku e banko lo lucha kontra desigualdat sosial i diversidat i inklushon den komunidat.