Back to Top
Responsive image
E korant di pueblo

Benta di vakuna falsu a subi merkado pretu


February 2, 2021 • 1 minüt pa lesa

Rome,– Algun luna pasá ta konosí kaba ku pa $20,- bo por kumpra un PCR tèst falsu kual ta demonstrá un resultado negativo di Covid-19. Awor ku paisnan grandi a kuminsá risibí i suministrá vakunanan kontra di Covid-19, kriminalnan a kuminsá bende vakuna falsu riba internèt.

Djaluna 1 di Febrüari, outoridatnan na China a logra detené 80 persona ku tabata produsí vakuna falsu. Segun reportahe na China, e persona nan tabata yena bòter chikitu ku un solushon di salu i nan tabata bende esaki komo un vakuna. Outoridat chines a logra konfiská 3000 bòter di vakuna falsu durante e detenshon.

Esaki no a stòp kriminalnan ku sa bende produkto ilegal riba internèt. Segun ekspertonan por kumpra vakuna for di $250,- riba internèt pero ta imposibel pa sa si esaki ta un vakuna di bèrdat. Riba e wèpsait nan por tuma nota ku bo no por kumpra 1 dosis so, pero bo lo mester kumpra kantidatnan grandi pa amigu i famianan.

FBI i Europol ta atvertí kontra di vakunanan aki debí ku bo no sa si ta trata di e produkto mes. Por tin chèns ku suministrashon di e vakuna kumprá ilegal tin líkido ku por ta fatal pa un persona. Outoridatnan ta kere ku kriminalnan ta kumpra e bòternan usá di e vakunanan i yena esaki ku un líkido no verifiká.

Den mayoria kaso por tuma kontakto ku e kriminalnan aki via Whatsapp, Email òf Telegram.



Login