Punda—Un suma di kasi 53 mion florin, ku mester a keda finalisá den benta di UTS a tuma lugá. Pero ainda tin hopi interogatorio riba e kompatibilidat final i spesifikashon di repartishon. Miéntras e benta total tabata pa 339 mion florin, Ministerio di Finansas no tin un bista spesífiko di tur e pagonan.

En general, UTS a duna un splikashon i konteo di e pagonan, pero Parlamento di Kòrsou, nunka no a risibi spesifikashon. Lokual ta konosí te ainda ta for di e suma di 339 mion florin, 6.1 mion florin a bai na pagonan di impuesto retrasá, 15.2 mion florin na retraso den konseshon, 6.5 mion na pagonan diversifiká, kasi 43 mion na demas kréditornan (other liability) i 86 mion florin na pagonan di penshun retrasá. Sobra sèn mester a keda repartí den akshonistanan ku tabata gobièrnu di Kòrsou i di St. Maarten, unda Kòrsou tabatin derechi riba 157.2 mion florin. E kompania representante di Flow, a tene kasi 56 mion riba un kuenta intermediario pendiente finalisashon pero e aña aki e suma ei tambe a keda kanselá. Kòrsou te awe a keda sin un splikashon riba repartishon di e suma mionario.