WILLEMSTAD—- Polis mester a bai riba Rooseveltweg na altura di Sta Maria Gallery pa un aksidente unda un motosiklista herida lo mester tabata na suela.
Ayera den oranan di atardi Polis a haña e informashon ku riba Rooseveltweg na altura di Sta Maria Gallery lo mester tin un motosiklista na suela despues di tabata envolví den un aksidente. Na yegada di polis a bin topa ku e motosiklista na suela ku tabata kehando di basta doló. Den serkania di e víktima tabatin su bròmer na suela i na un distansha e outo ku tabata envolví den e aksidente tabata stashoná. For di un investigashon preliminar a bin sali na kla ku e motosiklista tabata koriendo riba Rooseveltweg den direkshon di Pòmp gasolin Sta Maria.
Un outo ku tabata biniendo for di e direkshon kontrali a bai pa lora drenta e tereno priva di Sta Maria Gallery nèt na momento ku e bròmer tabata aserkando. Esaki a pone ku e bròmer a dal na altura di e porta patras pa despues e motosiklista bai kai leshonando su mes. Personal di ambulans ku a presentá na e sitio a duna e víktima e promé asistensia pa despues a transporte pa CMC pa opservashon médiko. Forensys a keda enkargá ku e aksidente.