WILLEMSTAD – Parlamentario Rennox Calmes i ademas lider di partido Trabou pa Kòrsou, a manda un karta pa Presidente di Parlamento Charetti America-Francisca ku e petishon pa un reunion públiko tokante ratifikashon di ILO C190.

Calmes a tuma nota ku paisnan manera Antigua and Barbada, ta e promé pais den Karibe i Bahamas ku ta e di dos pais den Karibe ku a ratifiká ILO C190 komo solidarismo pa hendenan muhé ku ta eksperensiá intimidashon i diskriminashon seksual na boka di trabou. “Komo ku den nos Parlamento di Kòrsou tambe tin hendenan muhé ku ta forma parti dje komunidat di Kòrsou, Trabou pa Kòrsou ke mira nos pais tambe para pa e derecho di hendenan muhé den parti di defensa akí.”

Calmes ta rekordá ku dia 31 di ougùstùs aña pasá frakshon di Trabou pa Kòrsou tabata e úniko ku a bishitá e simposio di “Advancing Inclusive Labor Markets in Aruba and Curaçao”, ku tabata hopi importante pa pais.

“Ounke komunidat no ta tende di e kasonan di akoso seksual abiertamente, e ta eksistí den nos pais sí. Dia 27 di mart 2024 na Universidat di Kòrsou tabatin un seminario tokante traha huntu respetuosamente (“respectvol samenwerken”), kaminda sra. Boelijn, kolaborador i sekretaria di Trabou pa Kòrsou a trese i aportá ku su parti di konsensia, na e públiko presente e anochi ei.”

Segun Calmes, debí ku nos leinan no tin e parti di ILO C190 den dje, nos leinan tin buraku den nan. Trabou pa Kòrsou ta di pensamentu ku mester hinka ILO C190 den nos leinan. “Tantu den “Burgerlijk Wetboek” (Kódigo Sivil) i reforsá den “Wetboek van Strafrecht” (Kódigo Penal), p’asina e kasonan di akoso seksual na trabou i definishon di akoso seksual keda atendé segun e kondishonnan ku tin mará na e lei.”

E Parlamentario ta informá ku na 13 di yüni 2023 Bèlgika tabata e delaster pais kaminda a ratifiká e artíkulo di ILO C190. “Pa e motibu akí, Trabou pa Kòrsou ke trese e parti di kambio akí dilanti, pa nos por kuminsá sinta huntu, deliberá i fortifiká e leinan den kuadro di derecho di hende muhé. P’esei Trabou Pa Kòrsou ta hasi un yamada na Presidente di Parlamento ku tambe ta hende muhé, pa hasi uzo di su funshon komo Presidente di Parlamento, hasiendo uzo di artíkulo 64 di Reglamento di Orden, pa yama un reunion públiko ku e tópiko menshoná. Calmes ke pa invitá Minister di Hustisia Shalten Hato i Minister di Desaroyo Sosial, Labor i Bienestar, Ruthmilda Larmonie-Cecilia pa Parlamento di Kòrsou tambe por ratifiká ILO C190 pa pais i pueblo di Kòrsou. “I asina habri e kaminda pa por hasi adaptashon na nos leinan.”