Back to Top
Responsive image
E korant di pueblo

CMC ta stòp operashon elektivo pa pashèntnan di SVB


September 29, 2021 • 2 minüt pa lesa

Punda— Curaçao Medical Center e siman aki ta bai disidí pa stòp tur operashon elektivo pa pashèntnan di SVB. E motibu prinsipal ta pasobra ku CMC no ta risibiendo sufisiente pago for di SVB pa finansiá e operashonnan. E situashon aki ta pone kuido na Kòrsou den un problema serio.

Entre CMC i SVB, aparte di tin un kaso andando den korte, tin diferente disputa riba tarifa i kompensashon.  CMC na 2020 a hiba un pèrdida di kasi 30 mion miéntras te ku sèptèmber 2021 ta kalkulando e sifra pa yega 38 mion florin. E motibu mas prinsipal di e pèrdida ta pa motibunan di diferensha entre SVB i CMC pa lokual ta trata kosto di kuido diario. Entre CMC i SVB tin un diferensha di por lo ménos 700 florin pa lokual ta trata kompensashon pa estadia den e instituto. CMC ta kargando kasi 60 mil dia di kuido anual i na un diferensha den pago di 700 florin pa dia, por papia fásilmente di por lo ménos 40 mion na diferensha.

CMC i SVB ta e.o. den korte unda e claim di CMC por yega 30 mion florin òf mas. E problema ta dual. Di un parti SVB ta paga lokual tin na presupuesto i CMC ta bai korte pa eksihí adaptashon i pago pa e diferensha. E Lei di Konsenso COHO, mediante ehekushon di Landenpakket ta tratando na yega na un solushon pa oumentá tarifanan di kuido den e segundo liña di kuido. Esaki den koperashon ku kompanianan asegurado. Pero COHO no ta yega na tempu. CMC a baha e kortina i stòp di duna sierto servisionan na pashènt di SVB. CMC for di salida a konfrontá problemanan finansiero. I ku e tarifanan aktual no tin muchu espektativa tampoko.

Pa por sobrebibí, CMC mester yega un okupashon di riba 90%, lokual no a logra debí na Covid. Covid na dos okashon a para operashon elektivo na CMC lokual a baha okupashon i awor e desishon pa stòp operashon elektivo pa klientenan di SVB, tampoko no ta yuda. CMC ta operando ménos pashènt i konsekuentemente okupashon di kama ta baha pasobra tin ménos pashènt ku ta keda drumi den CMC. Un otro aspekto ku a kousa problema na CMC ta pashèntnan di Covid ku ta kostando mas sèn i ta drumi mas largu den CMC. Ta kalkulá ku durante 2021, okupashon na CMC a yega 82%.

Login