Minister Cijntje dunando splikashon den e rueda di prensa ku direktor di CTB, Hugo Clarinda.

Penstraat,– Den un konferensha di prensa, Curacao Tourism Board, a presentá plan pa organisá vários enkuentro pa determiná kon ta sigui ku turismo teniendo kuenta ku tur stakeholders.

Tantu Minister di Desaroyo Ekonómiko, Ruisandro Cijntje komo e direktor di CTB, Hugo Clarinda, tabata na palabra pa duna informashon na prensa tokante nan plan aktual. Pa sigui ehekutá e plan stratégiko di turismo, CTB den kordinashon ku Ministerio di Desaroyo Ekonómiko ta bai organisá 5 diferente seshon kaminda vários stakeholders ta bai diskutí tokante diferente aspekto di nos turismo.

Segun splikashon, ta bai tin 5 diferente seshon kaminda e promé seshon ta tuma lugá riba 31 di mei i e último seshon lo tuma lugá riba 27 di sèptèmber. Durante e seshon nan, kual a wòrdu yamá “Kumbre Nashonal” diferente partido embolbí den turismo ta risibí oportunidat pa partisipá i duna nan punto di bista. Kada kumbre lo tin un tópiko. Algun dje tópikonan ta inkluí kon mester konservá e outensidat, naturalisa i historia di Kòrsou, kaminda na mesun momentu mester propagá turismo. Otro tópiko ta kon mester konsientisá siudadanonan tokante turismo. Alabes, un otro tópiko ta ki limitiashon turismo tin i kon mester optimalisá e kresementu di e sektor aki pa e no bira un molèster pa pueblo.

E meta final di e kumbre nashonal tokante turismo ta pa nos tur por sigui disfrutá di nos turismo, segun e splikashon nan di Hugo Clarinda i minister Ruisandro Cijntje.

Na momentunan aki turismo ta e pilar ekonómiko mas grandi di Kòrsou, pero segun e maneho di minister Cijntje, e ta tratando na diversifiká e ekonomia, pero tambe diversifiká e sektor turístiko. “Aktualmente Kòrsou konosé un “high season” i un “low season”, pero ku diversifikashon adekuá, por sòru entre otro ku e fluho di turista ta keda konstante.