Willemstad—- Segun Minister di Hustisia senor Hato ku ta bon pa enfatisá ku Kuerpo Polisial Kòrsou durante e último 4 luna ku a transkurí a tene diferente kòntròl riba nos karetera nan i durante di e kòntròl nan sostené aki a repartí 521 multa pa diferente infrakshon den tráfiko.

Durante di e vários kòntròl nan aki, polisnan a repartí multa pa pasamentu den lus kòrá, vehíkulonan sin e dokumento nan nesesario, faha di seguridat ku shofùrnan no ta bisti, trùknan grandi ku no ta tapa nan shushi di forma adekuá, pero tambe shofùr nan ku a pasa den lus kòrá. Esaki ta indikashon ku Kuerpo Polisial tin e atenshon nesesario pa shofùrnan ku no ta komportá di forma debido òf ku ta sali kas sin nan dokumento nan.  Mas aleu Minister di Hustisia a atendé ku Kuerpo Polisial Kòrsou tambe i huntu ku Ministerio di Tráfiko i Planifikashon Urbano a inisiá trámite nan pa un tereno pa kita vehíkulonan sin dokumentashon tambe. Durante kòntròl a tuma nota ku no solamente mester duna shofùr nan un multa pa e diferente infrakshon kometé, pero den sierto kasonan mester kita e vehíkulo for di riba kaya pa falta di inkumplimentu ku nos leinan di tráfiko. Pronto Ministerio di Hustisia huntu ku Kuerpo Polisial Kòrsou i Ministerio Públiko lo anunsiá un maneho nobo den kual lo aktua aun mas duru kontra shofùr nan ku no ta kumpli ku deber di dokumento nan na òrdu na momentu di subi via públiko. Re-introdukshon di e fasilidat asina yama kura ta un di e stapnan ku ta forma parti di e maneho aki.

Minister Shalten Hato ta enfatisá ku durante próksimo dianan lo sigui ku kòntròlnan den tráfiko pa salbaguardiá seguridat di esnan ku ta kumplí i pone man duru pa aktua kontra esnan ku ta kometé infrakshon den tráfiko.