Patrick Newton: kontrakt prolonga.

Isla—Patrick Newton por lo pronto ta keda komo direktor na Refineria di Kòrsou. Newton kende tabata eks komisario di e organisashon, a bira direktor di e kompania estatal petrolero i awor a keda prolongá. Maneho di Newton na RdK, tabata bastante diskutí despues di a referí diferente kompania kuestionabel komo posibel kandidato komo sosio stratégiko di RdK.

Newton a wòrdu kuestioná pa diferente motibu, prinsipalmente su relashonnan i presensia públiko ku miembronan den grupo di Caribbean Petroleum Refinery, kompania kual sosionan a falsifiká dokumentashon den kuadro di proyekto Arawak. Te ku último, RdK a emití un komunikado kontroversial unda nan ta desmentí di tabatin kontakto ku e grupo CPR i un supuesto sosio nobo, lokual a resultá di tabata bèrdat. Mas aleu, kontrali na lokual, Refineria di Kòrsou ta insinuá, e kompania estatal  tabata tratando na yuda kompanianan den a “bid” pa Refineria Isla, los nan sèn na banko. Esaki ta lokual por konkluí for di diferente korespondensha entre Refineria di Kòrsou i representantenan di e kompanianan. I ta trata di korespondensha ku a tuma lugá 3 di Yüli último. Unu di e pruebanan ta regardá un korespondensha entre Hans Vissers, CFO di RdK i Javier Hernandez, konsehero òf kontakto di e grupo Socap di Raul Socorro. Durante e promé siman di Yüli, Hans Vissers ta manda un korespondensha pa Javier Hernandez, despues ku RdK a risibi un kuestionario largu for di Banco di Caribe. Vissers a manda e kuestionario pa Hernandez,  pa Hernandez por manda esaki pa Socap i asina fasilitá RdK ku kontestanan pa Banco di Caribe. Socap ta a kompania di Raul Socorro, kende despues a entrega e derechinan di riba maneho na Isla den man di CPR.

Riba 3 di Yüli, Hernandez ta manda e karta di Vissers pa representantenan di Socap pa nan por kontesta e preguntanan mas lihé posibel di RdK pa por logra los sènnan di hür pa Bullenbaai, pegá na Estádos Unídos. Esei ta nifiká ku ainda RdK tabatin debido kontakto ku Socap, kual kompania ta e kompania ku a gana e bidding pa Refineria Isla i despues a pasa e derechinan over pa Caribbean Petroleum Refinery.  Riba 21 di yüni, den un karta na promotornan di un sosio nobo, Socap ta konfirmá den un korespondensha ku ainda nan a keda informá pa RdK, ku nan oferta ta esun mas mihó riba mesa. Segun representantenan di Socap, ta funshonarionan di RdK mes a konfirmá ku te ainda nan oferta tabata esun di mas mihó.  

Tambe tin e tratamentunan den korte di hustisia unda abogadonan di Socap i sosionan a konfirmá den korte ku Refineria di Kòrsou, a konsiderá e sosionan di Socap, komo esnan mas serio pa por sigui manehá Bullenbaai. Segun e abogadonan defensor di Socap i sosionan, nan ta wardando un desishon den e wisio sumario pa nan por sigui e trayekto di manehá Bullenbaai, asina ku e asuntu di kuentanan bankario keda aklará.

Mas serio ainda, tabata e karta di intenshon proponé pa Socap por introdusí e kompania Invema, komo nan sosio finansiero nobo, kual segun Socap tambe Refineria di Kòrsou tabata na altura di esaki. Vigilante a trata na risibi konfirmashon di RdK a risibi e proposishon di Invema, no a risibi reakshon riba esaki. RdK i Newton a desmentí di tabata na altura di Invema.

For di Sèptèmber 2022, riba e entrega di fuel oil tabatin bastante informashon inkorekto ku e sirkulá, kualnan despues den korte i awor tambe via di kuestionarionan bankario a bin resultá di tabata inkorekto. Mas aleu, na desèmber, representantenan di RdK a mal informá Parlamento di Kòrsou riba dokumentashonnan falsifiká te na momento e investigashonnan ta andando bou di ouspisio di Prokurador General.

Newton, di otro banda a logra firma kontrakt ku Global Oil, ku na e momentonan aki mester ta inisiando nan operashon di asfalt riba tereno na Refineria Isla. Tambe resientemente a anunsiá e kompania Oryx, komo kandidato potenshal pa ópera riba tereno di Isla.