Kòrsou lo ta sede pa eventonan durante di 11 te ku 14 aprel próksimo.

WILLEMSTAD—Despues di e éksito rotundo di e Weganan di Deporte Interinsular na Aruba i Boneiru, Kòrsou ta kla pa aseptá atletanan, durante di e periodo di 11 te ku 14 di aprel benidero.

Esaki pa un demostrashon eksepshonal di talento deportivo di Aruba i Boneiru. Bou di bandera di “Weganan di Deporte Interinsular Kòrsou 2024”, e evento aki ta primintí di ta unu ku lo destaká riba e kalendario di deporte den region di Karibe.

E término “Weganan Interinsular” ta kontené e esensia di kompetensia entre islanan, unda atletanan di vários isla ta prepará pa kompetí den diferente disiplina manera atletismo, vòlibòl, básketbòl i muchu mas. Kòrsou, konosí pa su kultura vibrante i di hospitalidat kaluroso, ta wardá ku entusiasmo pa aseptá e evento prestigioso i tambe pa por reforsá vínkulo- i lasonan entre e hubentut di den region.

Atletanan lo partisipá den diferente kategoria, riba nivel di skol básiko den kual pa atletismo lo partisipá mucha hòmber i mucha muhé (segun edat, unda partisipantenan mester ta nasé entre aña 2011-2014) i den vòlibòl ku mucha hòmber so, (segun edat, unda a nase entre aña 2010-2012).

Riba e nivel di skol avansá, básketbòl 3×3, lo ta eksklusivamente pa mucha hòmber (unda ku partisipantenan mester a nase na aña 2006, òf despues. E kompetensianan aki no solamente ta mustra e talento i dedikashon di e atleta hóben, pero tambe ta sirbi komo un plataforma pa promové estilonan di bida saludabel, trabou den tim i rèspèt mutuo.

E Weganan di Deporte Interinsular ta enfatisá riba e spiritu di union i deportivismo, yudando atletanan for di diferente isla pa selebrá nan pashon komun pa deporte. Kòrsou ta komprometí pa sigurá un eksperensia memorabel i inklusivo pa tur partisipante, kultivando amistatnan ku ta traspasá fronteranan i inspirá e próksimo generashon di atletanan.

Uni ku nos na Kòrsou di 11 pa 14 di aprel 2024, miéntras ku nos ta reuní pa selebrá e deportista, amistat i e espíritu vibrante di Karibe. Pa optené mas informashon i aktualidat, por bishitá FDDK su sitionan di ret sosial.