Momentu ku delegashon di TCCA ta papia ku Presidente di Parlamento i grefi Silvin Cijntje, i tambe hasi entrega di e statutonan.

WILLEMSTAD – Un tópiko di dia na Kòrsou pa hopi dékada kaba ta transporte públiko. E diskushonnan rondó di transporte spesial pa personanan desabilitá tambe a oumentá durante último añanan.

Ayera Parlamento a para ketu na e tópiko di mas importante ku ta restrukturashon di transporte públiko den Komishon Sentral. Minister di Tráfiko, Transporte i Planifikashon Urbano (VVRP) Charles Cooper a risibí masha hopi pregunta i mester di tempu pa kontestá esakinan. Presidente di Parlamento Charetti America-Francisca lo bai wak agènda i riba petishon di Parlamento lo konvoká e reunion mas lihé posibel.

A reuní ayera riba petishon di frakshon di PAR di dia 7 di yüni último. Frakshon di PAR ke sa di Minister Cooper kon leu ta ku e plannan pa kambia e sistema di transporte públiko i tambe eventual kambionan ku a bini den e plannan eksistente. Ana Maria Pauletta a pidi Cooper ayera promé ku a habri e promé tanda di pregunta, pa algun dokumento di ABC Busbedrijf. Cooper a splika ku e kuentanan anual di 2020 te ku awó no ta disponibel pa motibu dje situashon finansiero dje kompania. El a keda di manda esun di 2019 pa Parlamento. Tambe e lo entregá e rapòrt di Stichting Belasting Accountants Bureu ku Pauletta a pidi.

Zita Jesus-Leito a mustra riba e echo ku transporte públiko ta super impotrante pa tur hende i pa ekonomia di pais. Steven Martina di MAN ke sa di Cooper kiko ta bai hasi pa drecha e servisio di ABC Busbedrijf i si e lo laga Bureau Telecommunicatie & Post hasi un investigashon amplio di transporte públiko, pa presentá un preis i eliminá diskushon tokante esaki. Meskos ku PAR, frakshon di MFK tambe ta hopi preokupá pa aksesibilidat pa tur hende, spesialmente esnan desabilitá, na transporte públiko. Fergino Brownbill a mustra riba e echo ku ta for di 2012 Parlamento ta reuní tokante e tópiko akí, sin ku muchu a kambia.

Na yüni 2012 pa promé biaha despues ku a desmantelá Antia, Parlamento di Kòrsou a sinta ku ABC i a kuminsá papia tokante desaroyo di e kompania su servisio. “Na 2014 a pasa un moshon enfoká riba e aspektonan pa yega na un transporte públiko interkonektá, aksesibel, i pagabel for di Oostpunt te ku Westpunt. Awe den 2023 no ta muchu kos a kambia.” Cooper tabata dispuesto na keda reuní te mardugá mes si ta nesesario pa kontestá tur e preguntanan, pero den mesun rosea a splika Presidente di Parlamento ku tin algun kos ku mester regla tòg promé. El a hasi e petishon pa si mester bini huntu otro siman mes bèk pa kontesta, e lo preferá pa ta mas den kareda di fin di siman.

Basta representante di transporte públiko tabata presente durante dje reunion i tabata ansioso pa sa e kontestanan di Cooper. Pero Presidente di Parlamento a skòrs e reunion te un otro aviso. E mester bai wak espasio den agènda promé. Mientrastantu Parlamento lo hasi un bishita di trabou na ABC Busbedrijf. Esaki tabata un proposishon di Parlamentario Brownbill, ya ku miéntras tur hende ta sinta warda riba kontesta di Minister Cooper, e personal di ABC Busbedrijf sigur meskos ku komunidat, lo keda den un limbo.

Taksistanan

Un grupo ku sigur no ta kontentu kon henter e asuntu di restrukturashon di transporte públiko ta kanando kaba ta e organisashon ‘Taxi Curacao Co-Association’ (TCCA), fundá ofisialmente dia 30 di mart último. Un delegashon a ayera a bai hasi entrega di e statutonan di TCCA na Presidente di Parlamento. E asosiashon a duna un splikashon tokante nan metanan i e desafionan ku nan ta konfrontá komo taksista. TCCA tabata representá pa Presidente Rothney Wyman i miembronan Isidora Brazao i Henry Plaate. E taksistanan no ta kontentu, pasó gobièrnu i Parlamento kada bes ta papia tokante e tópiko akí, sin nunka papia ku e representantenan dje sektor di transporte públiko mes. Nan ke ta embolbí. Manera Vigilante a informá na yüli, entre otro Plaate a manda un petishon pa Parlamento pa sinta tokante e tópiko ‘proposishon kambio di lei T.P. di Minister Cooper’. Nan no a risibí niun invitashon, ni sikiera kontesta riba nan karta. I pa entre otro esei, a presentá na Parlamento pa entregá nan statutonan, pa nan tambe bira partner na mesa di diskushonnan.