Salario mínimo lo bira Fl 10,70 pa ora.

Willemstad,– Riba 1 di yanüari 2023 lo bai tin un oumento den e salario mínimo. Riba 15 di desèmber 2022 minister Larmonie-Cicilia a duna un splikashon tokante e oumento durante un rueda di prensa.

Djadumingu próksimo, esta 1 di yanüari 2023, salario mínimo lo oumentá di 9,62 pa 10,70 pa ora. Pues un persona ku ta traha 40 ora pa siman lo kobra 1853.24 florin. Un persona ku ta traha 45 ora pa siman lo kobra 2.084,90 i un persona ku ta traha 48 ora pa siman lo kobra 2223,89 pa luna.

Durante e rueda di prensa riba 15 di desèmber e minister di SOAW a splika ku kasi 60% di e poblashon laboral ta kobrando un sueldo mínimo. Mirando e echo di e 60%, e minister a opta pa traha riba un konsepto nobo pa asina oumentá e sueldo mínimo. Minister Ruthmilda a splika ku ta for di mart su ministerio tabata traha riba e konsepto i ta na novèmber tras di lomba e konsepto a keda finalisá.

RIchard Doornbosch di banko sentral a splika ku e oumento di salario mínimo lo no tin efekto riba e kresementu ekonómiko na 2023. Segun e presidente di banko sentral, apesar ku gastunan operashonal lo oumentá i preisnan di produkto lo oumentá untiki, e oumento di salario mínimo lo no afektá e ekonomia. Tambe Doornbosch a duna algun splikashon teorétiko tokante oumento di e salario mínimo. Segun Doornbosch, ántes literatura sientífiko a indiká ku oumento den salario mínimo lo afektá kresementu di un ekonomia drástiko, pero literatura mas moderno ta indiká lo kontrario. Den un estudio ehekutá dor di Banko Sentral kaminda e organisashon a investigá e efekto di oumento di salario mínimo na Kòrsou na 2008 aktualmente ta resultando ku e efekto ekonómiko tabata mínimo e tempu ayá.