Stranhero ta bin Kòrsou i sera Playa Hunku pa kobra lokalnan 2 mil florin pa akseso

 WILLEMSTAD – Parlamentario Gilbert “Gibi” Doran a manda un karta ku 7 pregunta pa Minister di Tráfiko, Transporte i Planifikashon Urbano Charles Cooper tokante akseso públiko di Playa Hunku.

 Tin informashon ku tin un hòmber ku no ta yu di tera ku ta atendé e tereno pegá ku Porto Marie i ku ta mantené akseso na Playa Hunku será te na momentu ku pagué 2 mil florin pa por hasi uso di esaki. Doran ke sa di Cooper ta kiko ta pasando.

Segun e Parlamentario, ta konosí ku e tereno pegá ku Porto Marie ta un tereno privá. Pero echo ta ku e playa ta públiko. “E tereno tin un bum será ku kandal, opstakulisando pasada pa subi esaki. Nada kontra. Sinembargo, e echo ku e laman ta keda na kosta di e tereno, no ta hasi e persona akó doño di e playa. Di e manera akí, abitantenan di nos isla ku ta deseá di sea hasi un fiesta òf kasamentu na e playa menshoná, a skucha via via ku ta e mener ta karga yabi di e bum, pues ku mester tuma kontakto ku e mener. Asina a bin bira konosí ku e shon ta kobra 2 mil florin pa hasi uso di nos playa, riba nos tera, na nos pais.”

Pa Doran i naturalmente kasi tur otro ku tende e notisia akí, ta insólito sinta mira e tipo di inhustisianan akí tuma lugá. “No por ta asina ku ningun hende for di ningun parti di mundu ta bini i bin manda i restringí e yu di tera pa hasi uso gratuitamente di su playanan. Minister ta na altura dje situashon ku ta tumando lugá akí na Playa Hunku? Kiko ta realmente loke ta pasando den e kaso akí? Kiko ta opinion di Minister relashoná ku e kaso menshoná? Kiko lo mester hasi pa resolvé e problema aktual pa ku playa Hunku? Kon bin ta e mener menshoná ta e úniko ku tin akseso legal na e playa? Kon bin e yu di tera no tin un via legal pa tin akseso na e playa?” Finalmente Doran ke sa prinsipalmente kiko ta e plan ku gobièrnu di Kòrsou tin pa trese kambio den e situashon aktual. Konforme regla, Minister Cooper tin 2 luna di tempu pa kontestá e 7 preguntanan akí.