Theo Caris ku Sabine Altena, konseheronan di CBCS

Nieuwe Haven—Korte di Apelashon den kaso Ennia, tin dos alternativa pa laga balota Mullet Bay Beach Resort na St. Maarten. Tantu e grupo Ansary komo Banko Sentral Ennia a kumpli awor pa entrega nan kandidatonan.

Manera menshoná, Ennia Caribe/CBCS a presentá ku mes kompania ku nan a uza den pasado, Cushman and Wakefield, miéntras e kompania ku grupo Ansary a entrega a keda deskonosí. Djamars atardi 23 di Yanüari 2024,  último oportunidat pa entrega nòmber di un taxatùr konforme desishon di Korte di Apelashon. Ennia a bini ku mesun kompania ku nan a uza den pasado, lokual ta konfirmá ku Ennia ta aseptá e daño kalkulá pa korte na 260 mion florin mas e diferensia ku ta yega 90 mion florin.

Konforme e último desishon di e Tribunal Sivil, presidí pa hues mr. Geloven, Hushang Ansary i Ralph Palm, mester kubri tur kosto relashoná pa balotashon di Mullet Bay. Tambe, Ennia Caribe Holding huntu ku CBCS mester entrega nòmber di un kompania pa balotá e balor. Ansary i Palm tambe mester a duna korte un kompania. Di parti di Ansary i Palm esei a sosodé, pero Ennia i Banko Sentral no a entrega un kompania diferente. Dor di aktua asina, Ennia ta aseptá ku e balor menshoná den e veredikto di 260 mion florin na daño ta aseptabel. E aktuashon di Ennia i Banko Sentral, ta kontradesí tur lokual nan tabata informando pueblo i klientenan di Ennia. E daño na solbabilidat na Ennia, definitivamente no ta 1.2 miar florin.

Pero den algun di e balotashonnan tin duda. Mayoria eks direktor, te ku 2018 na Ennia Caribe Holding a partisipá konsientemente na forma dirèkt i tambe indirekt un balor fiktisio di Mullet Bay . Esaki dor di trata na hisa e balor di Mullet Bay na St. Maarten ku tabata registrá komo aktivo den registro na Ennia. Grupo Ansary na su turno tabata saka kèsh i aktivo fo’i Ennia kontra balor di Mullet Bay. For di un memo di KPMG, kontroladó di Ennia na inisio di 2009, tin stipulá eks direktor Abdallah Androus a súplika na e kompania di balotashon pa uza mil dòler pa meter kuadra komo meta pa yega na un balor di Mullet Bay. E memo ta bisa lo siguiente: “He (e kompania ku mester a balotá), told PWC that Abdallah asked him to value the land for U$ 1.000 per m2”. Esaki lo a pone e balor di Mullet Bay yega kasi 436 mion dòler estado unidense. Aparte di Abdallah, tabatin diferente otro eks direktornan na Ennia a trata na mantené e balor di Mullet Bay haltu, asina krea balor fiktisio di lokual Sun Resorts, komo doño di Mullet Bay tabatin den Ennia Caribe. Por ehèmpel, na mart 2009 Grupo Ansary via Parman International  ta bolbe hasi ingreso di akshonnan di Sun Resorts den Ennia Caribe Holding. Pa òktober 2010, dor di un balor haltu di Mullet Bay i Sun Resorts i Ansary ta hasi un transakshon di 348 mion florin na aktivo di Sun Resorts den Ennia Caribe Holding. Ku esaki Ennia  a bira pa 95% doño di Sun Resorts. Asina Parman tabata invertí den Ennia i despues saka sèn di asegurado pa invertí den kompanianan ligá ku Ansary, e.o. Stewart and Stevenson i tambe Kirby Corporation despues.

Na 2011, e kompania Independent Expertise Bureau, ku tabata un kompania solitario di Ton Valkenburg a hasi un balotashon di 400 mion dòler pa Mullet Bay. Na 2014 tin un balotashon mas di Valkenburg ku a yega 417 mion dòler. Na ougùstùs 2016 e problemanan a kuminsá bini. Banko Sentral, CBCS a ordená pa bende Mullet Bay i trese plaka aden. E kompania tabata balorá pa kasi 420 mion dòler. Despues e kompania renombrá internashonal CBRE a traha un balotashon i yega na un balor di 35.4 mion dòler, inkluso e kancha di gòlf. Esaki ta kasi 400 mion ménos di lokual e bukinan di aktivo ta registrá na Ennia Caribe. Eks ehekutivonan di Ennia, a puntra CBRE si nan a konsulta hinter e área di Mullet Bay. Siguiente dia Abdallah Andraous ta lesa e rapòrt i konkluí ku ta solamente un parti di Mullet Bay e kompania a balotá. E direktornan ta eksihí un balotashon nobo pasobra segun nan konklushon no tabata e tereno kompleto di Mullet Bay. E rapòrt di CBRE ta konkluí ku ta hinter 170 hektar kompleto di Mullet Bay tabata den su rapòrt. Despues di CBRE, Ennia a tuma un otro kompania pa balotá Mullet Bay, esaki despues ku Ansary a duna órden pa e mes skohe un kompania.

Durante investigashon abogadonan di Banko Sentral a bin deskubrí korespondensha entre eks direktornan na Ennia. “We have 1 shot to have a valuable appraisal to finish this discussion for once and for all”. Finalmente e balotashon di CEI tambe a ta bin kai na 436 mion dòler, pero gerensha di Ennia a supliká balotashon na momento rekonstruí Mullet Bay i no abase di un balotashon manera e ta den su estado aktual. “The analysis of the market value is based on the assumption of the sale of a building land to developers and investors”. CEI despues ta atmití na KPMG ku nan a risibi diferente instrukshon kon pa balotá Mullet Bay. Riba 27 di yanüari 2017 den un mail a súplika CEI pa balotá e terenonan manera ku nan tabata rekonstruí. Tambe a splika CEI ku tabatin un grupo chines interesá den kompra di Mullet Bay, miéntras te awe e propiedat a sigui meskos bou di Sun Resorts di grupo Ansary.

Segun un investigashon di Ennia, CEI a konkluí ku e tereno di Mullet Bay manera e ta den su estado aktual no ta bal nada: “because as it is today: a golf course loosing money, the value would be near zero. As we told you & your advisor Accuracy since day one”. Despues di yüli 2018, Banko Sentral a laga e kompania Cushman and Wakefield balota Mullet Bay i yega na 50 mion dòler.