Mullet Bay: entrega dokumentonan balor di Mullet Bay ta posponé te ku Yanüari próksimo.

NIEUWE HAVEN—Korte mester bolbe posponé entrega di dokumentashonnan riba balotashon di Mullet Bay. E entrega programá pa tuma lugá despues di un kambio, riba 5 di desèmber probablemente ta bai pa yanüari 2024.

E diskushon na e momentunan aki ta kuantu realmente Mullet Bay ta bal. Korte di Apelashon, a manda e balotashon bek pa tratamentu bou di ouspisio di ekspertonan. Pero entre grupo Ansary i Banko Sentral no tin un kombenio riba e kompania di balotashon. Nina Ansary, kende tambe ta partido a súplika pa posponé tratamentu, pa e por entrega dokumentashon. Pa Nina Ansary e balotashon tambe ta importante. Si resultá ku e balor di Mullet Bay no ta korespondé na e sumanan di dividendo, kada un eks direktor òf partido di interes mester para responsabel pa e défisit.

Balor di Mullet Bay Resort ta un diskushon importante pa determiná si e grupo di Ennia Caribe Holding via di EC Investment i Ennia Caribe Leven, tabatin outorisashon pa invertí for di e bolsa di aseguradonan di Ennia, den e kaso aki tambe penshonadonan. Banko Sentral a sigui kuestioná si e balor riba balans na Ennia Caribe Leven ta unu representativo. E balor di Mullet Bay a hasta yega na un diskushon den Kámara di Akountent na Hulanda. Kámara di Akountent a konkluí ku dos akountent  kende a sera bukinan di Ennia, no a duna sufisiente oposishon kontra di e balor di Mullet. Entretantu den e relato anual nobo di akountent, e balor di Mullet Bay ta bolbe keda kuestioná.