Javier Silvania, minister di Finansas Publiko.

Nieuwe Haven, — E desishon di gobièrnu di Kòrsou pa eksonerashon di impuesto 2017, a bai korte i ta pendiente un desishon pa ougùstùs próksimo. Un konsultorio fiskalista renombrá na Kòrsou, kier pa Minister di Finansas  òf su Ministerio duna klaridat riba e proseder pa yega na e desishon di eksonerashon. Esaki pa por forma un base di eksonerashon pa demas kasonan tambe òf aló ménos inisiá e proseder pa yega na un balansa den desishon di eksonerashon.

Manera publiká den Vigilante, e konsultorio fiskalista, a hasi un petishon mediante e dekreto LOB, pa risibi mas informashon riba eksonerashon di impuesto 2017. Esaki ta lokual fuentenan den seno di e ministerio di Planifikashon i Organisashon a señalá na Vigilante. Mediante e dekreto di LOB, Dekreto Nashonal Riba Transparensha di Maneho, gobièrnu di Kòrsou ta obligá na entrega detayenan regardando e desishon di maneho na Ontvanger riba eksonerashon di impuesto.  E petishon pa mas klaridat ta un proseder lógiko di parti di e konsultorio, mirando e nesesidat di mas informashon pa alabes suministrá nan klientenan ku ta puntrando. E problema ta bira, kiko e ministerio di Planifikashon i Organisashon ta bai duna komo kontesta despues di konsulta ku Ontvanger di Kòrsou.

Pero dos tèrmino di tempu a pasa sin ku e konsultorio a risibi informashon, lokual a kondusí na pa inisiá un prosesá den Tribunal Atministrativo (LAR) pa forsa un desishon den korte. Esaki a enserá entrega di un petishon ofisial pa tratamentu, lokual a tuma lugá i tin un desishon pendiente pa ougùstùs próksimo riba e tratamentu. E desishon di korte ta un desishon delikado, mirando ku hopi kompania ta pendiente e desishon riba e proseder pa yega un desishon di eksonerashon.

Den un splikashon na Parlamento minister di Finansas Públiko, Javier Silvania a bisa ku Ontvanger ta “focus” riba kobransa di debenan di 2018 bai ariba. E maneho  ta enserá ku aanslagen di 2017 òf mas bieu lo no wòrdu kobrá aktivamente. No ta enserá ku a duna abolishon (“kwijtschelding”), pero ku Servisio di Impuesto ta konsentrá nan kapasidat limitá pa kobra aanslagnan mas yòn ku posibilidat mas haltu di kobransa, teniendo kuenta ku e 3  eksepshonnan: 1. si esakinan a wòrdu imponé den kuadro di un investigashon penal fiskal; 2 Si e debe di impuesto di e añanan 2017 òf mas bieu ta suma NAf 1 mion òf mas i si Servisio di Impuesto tin informashon ku ta demostrá ku tin posibilidat di kobransa; 3 si e debe di impuesto di e añanan 2017 òf mas bieu ya a ser pagá via di kuentanan di tersero (e asina yama derdenrekening manera entre otro di notarionan).