Nieuwe Haven– Den kuadro di selebrashon di 80 aniversario di e agensia funeraria, ayera tardi a tuma lugá un konferensha di prensa kaminda direktor sr. Haidel Haile, a kompartí di ki manera lo bai konmemorá e añamemorabelaki.
Kompañá pa su tim di maneho, ku ta konsistí di sra. Janete de Agrela komo ‘HR-manager’ i Hefe di Atministrashon, i sra. Godalys Reina komo Hefe Operashonal, sr. Haile a elaborá riba plannan pa futuro di e organisashon.
”Mas ku nos ta un agensia funeraria, mi ta konsiderá El Tributo un organisashon ku ta duna hospitalidat na e momentu mas difísil den un hende su bida. Duna servisio di kalidat haltu ta un di e pilarnan mas fuerte di nos agensia. Den kuadro di esaki i siguiendo desaroyonan no solamente lokal so, pero internashonalmente tambe, pronto El Tributo lo bai habri su propio krematorio.” sr. Haile a duna di konosé.
E krematorio ta un edifisio kompletamente nobo ekipá ku e último teknologia pa por kumpli ku tur e reglanan vigente di e proseso di kremashon. E krematorio ta un fasilidat inovativo a kumpli ku delaster un eksigensia di e klientela di El Tributo, ku di e manera aki kier sigui duna pueblo di Kòrsou e mihó servisio i máksimo komodidat.
I den e kuadro aki El Tributo lo bai tin un Dia Habrí pa henter komunidat por bin sera konosí i siña tokante e proseso di kremashon. E Dia Habrí lo ta riba djasabra 16 di mart 2024 for di 9or di mainta pa 12or di mèrdia. Entrada lo ta gratis.
Kontinuando riba e tema di selebrashon Haidel tambe a duna di konosé ku El Tributo lo bai duna bèk. Pero den un forma spesial. Ta importante pa kada individuo para ketu pensa i reflehá riba su bida. Nos tur tin di muri un dia, esei ta nos destino komun. Pero e manera kon kada un di nos ta biba i honra nos bida i salú mental ta un eskoho personal i hopi krusial. I ta netamente pa e motibu aki El Tributo ta bai organisá un evento kaminda ta bai inspirá kada un presente pa para ketu na e puntonan aki.
Dia 2 di mart 2024 lo bai tin e seminario ‘Honrando Bida i bo Salú Mental’, esaki tambe ta un evento kompletamente gratis ku lo tuma lugá for di 9or di mainta te ku 12or di mèrdia aya na El Tributo