Javier Silvania: entrada den edifisio na Ennia ta indikativo ku “wega polítiko” a start den problema Ennia.

Gorsiraweg– Lider di Sindikato STS, kende ta representá empleadonan den seguro (Ennia),  a ekspresá su prekupashon riba e situashon na Ennia. Esei e la mustra durante un rueda di prensa e siman aki na sentro sindikal di CBV.

 Ta trata di sr. Sherwin Elvilia, kende tabata na un rueda di prensa ku e sentralnan sindikal, CGTC i SSK a organisá riba Ennia. Tabata un rueda di prensa unda e la anunsiá un aliansa entre algun organisashon pa defendé interes di penshonanan Ennia i empleadonan. Na e rueda di prensa tabata presente representantenan di CGTC, George Hernandez, SSK Wendell Meulen, ASPEN Elgin Felipa, STS Sherwin Elvilia, CBV Analiza Mathilda i pa  Boneiru Usibu Angelo Vrolijk.

Elvilia a konfirmá ku nan sindikato STS ta representá empleadonan ku ta traha den sektor di seguro i den e kaso aki tambe empleadonan na Ennia. Nan a bini komo miembro di CGTC i uni forsa pa forma un moketa pa salbaguardiá Ennia. Elvilia a trese dilanti ku tin un insertidumbre bou di empleadonan na Ennia. Nan ta den e boto na Ennia komo trahadó i bo ta sinti e prekupashonnan pasobra bo no sa ta kiko ta bai pasa komo empleado na Ennia ni tampoko kiko ta bai pasa ku bo penshun, e la bisa. Empleadonan di Ennia e siman aki a risibi tambe bishita di Minister Silvania. Huntu ku penshonadonan di Ennia nan ta prekupá pa nan trabou i seguro di bida.

Presidente di e Asosashon Penshonadonan Ennia, ASPEN, sr Elgin Felipa, di su parti ta mira un opsekio di Hulanda riba e sosten di likides pa Covid, komo un solushon pa Ennia. Segun Felipa, si Hulanda a kumpli ku nan palabra di duna un parti di sosten di 911 mion florin komo opsekio, ta sobra un parti pa solushon e problema di solbabilidat na Ennia. Esei ta lokual e la trese dilanti durante un rueda di prensa na Veeris, den sede di e sindikato VBC. ASPEN tambe a forma un aliansa entre sentralnan sindikal CGTC, SSK i tambe sindikatonan CBV i STS, kual último ta e sindikato pa empleadonan na Ennia. Segun Felipa Hulanda mediante nan promé minister Rutte a primintí ku parti di e sosten di likides pa Covid lo no bira un fiansa, sino un opsekio. En total, Hulanda a duna 91 mion florin na sosten di likides i en bèrdat tantu Rutte komo eks sekretario di estado Raymond Knops a menshoná posibilidat di opsekio pa un parti di e sosten. En realidat Hulanda a opta pa hasi e 911 mion florin un fiansa kompleto i duna un proposishon pa fiansa èkstra di 1.2 miar florin pa Ennia.

Segun Analiza Mathilda, presidente di CBV, nan sindikato tin vários enkuentro di Ennia i anke e problema no ta unu a korto plaso, pero mester tin e prekupashon i atenshon nesesario. Nan komo CBV ta urgi gobièrnu pa presentá un solushon konkreto riba e problemátiko di Ennia. Segun Mathilda su hendenan mester tin pas i trankilidat i CBV ta forma un gran parti di e bolsa di seguro na Ennia. Ademas CBV tin miembronan ku ta kobrando penshun na kas ku ainda ta miembro di CBV i mester Sali na tur su interes, segun Mathilda. CBV ta opiná ku gobièrnu mester presentá un solushon. Atno promé ku 2024! E lider sindikal a atvertí tambe riba e hecho ku algun pakete di seguro bou di nan miembresia ta bai kaduká i nan no ta konsehá di kambia seguro, sino mas bien pa trese un solushon pasobra den pasado kambio den seguro di bida a kousa hopi pèrdida serka nan miembronan.

E sentralnan sindikal SSK i CGTC  den aliansa ku Asosashon Penshonadonan Ennia (ASPEN), STS, CBV i Usibu di Boneiru, a tene un rueda e prensa pa ekspresá nan prekupashonnan riba e situashon di Ennia. Durante e rueda di prensa, e lidernan i presidente di ASPEN a mustra interes pa solushoná e problemanan pa lokual ta trata e situashon di Ennia i Penshonadonan. E sindikatonan presente a haña di tabata oportuno pa mustra na prekupashon pa nan miembresia kende nan penshun ta kore na Ennia Leven (Bida). Tabata un rueda di prensa prematuro, mirando ku ainda e kasonan den korte entre Ennia, Banko Sentral i grupo Ansary  no a finalisá i hasta tin indikashon ku e daño finalmente no ta bai bira 1.2 miar manera Korte den Promé Instansha a indiká den nan promé veredikto. Segun Analiza Mathilda di CBV ta trata di “hopi sèn” envolví fo’i nan miembronan. Tampoko e sindikatonan tabata por duna un indikashon kiko konkretamente nan pasonan ta bira pa solushon e problema of kisas e riesgo di nan miembronan.

CGTC , via George Hernandez a para ketu tambe na Banko Sentral, ku ta responsabel pa supervishon. CGTC no ke los e problema for di Banko Sentral i ta konsiderá e instituto estatal di kòntròl monetario responsabel. Segun George,  e asegurado a konfia den Banko Sentral pa supervisá e kosnan bon, pero awor ta resultá ku Banko Sentral no a hasi e supervishon manera mester ta. Konsekuentemente Banko Sentral, CBCS a emití un informá di mester bai kòrtá den e balor di penshun. Pa CGTC esei no ta e solushon di mas mihó, Hernandez a bisa.

CGTC ta tuma e posishon pa pone Banko Sentral tambe responsabel i nan mester trese un solushon. Durante e ronda di pregunta, Hernandez a hasta bisa di mester laga nan tambe kontribuí finansieramente pa solushon e problema di Ennia, pasobra ta nan supervishon a faya. Aparte di Ennia, Gobièrnu i Ansary, Banko Sentral tambe ta responsabel pa solushon e problema di e penshonadonan.