Aprobá: direktornan interino na Ennia Caribe Holding ta permití sakeo mionario fo’i fondonan di penshun pa paga abogadonan internashonal

Punda—Awor ku Ennia Caribe Holding a opta pa sigui un trayekto èkstra den korte ku lo tuma por lo ménos 2 aña, primanan ku penshonadonan ta pagando, ta bai pa sigui finansiá abogadonan. Ya kaba, ta tratanto di un suma di riba 20 mion florin a bai gastá na abogasia i konseheronan relashoná ku e medida di emergensha imponé pa Korte.

Fakturanan di miónes a bai pa abogadonan estado unidense, oropeo i tambe konseheronan hurídiko lokal. Sin duda algun, e deseo di Ennia Caribe Holding pa sigui den korte lo surpasá 20 mion florin. Entre Ennia i Giro, e kostonan a oumentá i surpasá 25 mion florin. Esaki ta lokual por konkluí for di tratamentunan den kasonan di korte i petishonnan ku Banko Sentral ta hasi na Korte pa outorisá finansiamentu di e kostonan. Konforme artíkulo 35 dje ordenansa yamá “Landsverordening Toezicht Bank- en Kredietwezen (LTBK)”, ta Korte ta determiná e gastunan di areglo di emergensia i e gastunan di esaki ta bai pa kuenta dje entidat di krédito. Tambe ku e gastunan di esaki ta inkluí e gastunan ku e banko a hasi, i e kompensashon pa tareanan kumplí. Den e kaso akí Korte mester a husga si ta plousibel ku CBCS a hasi e gastunan akí, i tambe si nan ta rasonabel. Den un desishon provisorio CBCS a haña 3 pregunta pa kontestá. Konforme artíkulo 37 dje LTBK, CBCS mester entregá un petishon pa deklará un entidat di krédito fayit, si resultá ku esaki tin fondonan propio negativo i a logra e meta ku tabata ke ku e areglo di emergensia òf ku ya no por logra esaki mas.

E areglonan di emergensia ku tabata na vigor na promé lugá pa bankonan latino i despues pa Ennia, ta kostando mas ku 25 mion florin i mayoria ta bai na kostonan pa konseho hurídiko.

Mayoria di e pagonan den kaso Ennia a bai pa investigashonnan riba teritorio estado unidense i tambe abogadonan ku a bini for di Hulanda pa defendé kasonan sivil den korte. Den kaso di Ennia, e struktura di aktivonan sirkulante/mobil ku mester a konfiská, tambe tabata riba teritorio estado unidense. Aparte di esei, tambe tabatin kostonan relashoná ku Mullet Bay pagando ekspertonan pa balorá e propiedat. CBCS a paga konseheronan na Estádos Unídos i na Hulanda pa asistensha. A laga traha rapòrtnan ekstenso pa por kombensé korte na Nieuwe Haven di e sakeonan ku a tuma lugá i pagonan eksesivo si sierto kostonan. Te ainda e kostonan di e medida di emergensha a yega òf a surpasá 20 mion florin.