BREDA—Ministerio Públiko a drenta kasnan i ofisina di famia pa haña informashon di e paradero di Bolle Jos.

Jos Leijdekkers, sospechá den trafikashon di kokaina riba gran eskala, ta un dje sospechosonan mas buská den Hulanda. Dos dama di 68 i 27 a keda detené den e kaso. Famianan kaminda OM a drenta tambe ta keda sospechá di labamentu di plaka kriminal. OM ta sospechá ku nan a tuma plaka ku regalonan karu mientras nan tabata sa origen di e plaka. A tene entrada den edifisionan na Breda, Prinsenbeek i Rotterdam. OM a konfiská oloshinan karu, prendanan, tasnan di marka, selularnan, kompiter, kamara, ku gran kantidat di plaka. Tambe reshershinan a konfiská dos pasport aleman falsu.

Den 2022 OM a ofrese un rekompensa di 75.000 euro pa e tep di oro pa haña Bolle Jos. E ta riba lista nashonal di fugitivonan i di Union Oropeo (Most Wanted List). E no tin adres fihó den Hulanda, OM ta kere ku pa basta tempu el a bai Turkia. Su mayornan i ruma a bai Turkia, posiblemente pa tene kontakto kune. OM ta konsiderá Bolle Jos (31) komo e lider prinsipal den trafikashon internashonal di kokaina. Tambe labamentu di plaka i envolvimentu di violensia eksesivo i desaparishon ku morto di Naima Jillal, ku a pèrde den 2019.