Willemstad—-Federatie Antilliaanse Jeugdzorg (FAJ) konhuntamente ku Expertisecentrum Partners voor de Jeugd (Expect Jeugd), ku tambe ta forma parti di William Schrikker Jeugdbescherming i Jeugdreclassering na Ulanda, a duna treinen na algun trahadó di FAJ pa bira treiner profeshonal I sertifiká riba tereno di LVB.

Pa algun aña kaba FAJ tin un aliansa ku Expertisecentrum Partners voor de Jeugd. E aliansa aki ta riba tereno di edukashon di profeshonal nan di FAJ riba tereno di “LVB” esta limitashon mental leve, den forma di “train the trainer”. 

E sentro di konosementu di “LVB” di FAJ, ta pará pa duna informashon i konsientisá komunidat di Korsou i otro islanan den Karibe tokante e tema aki. E sentro aki tin diferente treinen, pa mayor, edukadó, profeshonalnan i tambe mucha.

Na momentu ku ta papia di un persona ku tin “LVB”, no solamente mester wak e IQ di e persona, si no tambe e manera kon e por adaptá I prosesá informashon. Loke FAJ ta enkontrá ta, ku tin personanan ku tin karakterístika di un persona ku tin “LVB”, e komunidat no ta komprondele i ta pèrdè pasenshi kuné. Pa e motibu aki ta importante pa tur sektor den nos komunidat tin sufisiente abilidat I konosementu pa por rekonosé i atendé ku e persona aki I sobre todo, yudé ku pasenshi.