HULANDA,—-No ta un sekreto ku aña pasá e organisashon enkargá ku Festival di Tumba na Hulanda, a dediká esaki na presidente di AMAK, kende ta Manfred “Feko” Gomes. Asta ta asina ku “Feko” a bai te Hulanda, pa por a risibí su dedikashon riba mesun fecha ku e festival a tuma lugá. Esaki tabata nèt un siman promé ku Zomerkarnaval 2022.

Ta asina ku ya pa algun dia kaba Vigilante Farándula, a haña informashon ku pa loke ta trata Festival di Tumba su edishon 2023 na Hulanda, ya e organisashon a skohe un persona ku nan ta bai dediká esaki na dje. E persona aki ta Pedro ”Hermanito” Narvaez.

Esaki sigur i sin duda ta un tremendo eskoho di parti di e dicho organisashon, ku tin señora “Bata” na kabes. Pa loke ta trata “Hermanito”, sigur ta trata aki di un persona ku konosé historia di Karnaval te den su fundeshi. Un persona ku hinter su biba, a dediká na dokumentá i tambe hasi grabashon di tantu Festival di Tumba, pero tambe marchanan di Karnaval i tambe Jump-In i Jump Up nan. No papia mes di otro eventonan ku tin durante di temporada di Karnaval.

Tambe ta asina ku na diferente okashon “Hermanito” a bai kubri evento nan karnavalesko for di Kòrsou i esaki a hasi “Hernamito” muchu mas konosí i mas ku klaro popular tambe. Un biaha mas loke ku e organisashon di Hulanda a hasi, esta dediká Festival di Tumba na Pedro “Hermanito” Nervaez, sigur ta un eskoho perfekto.