Changa: Hulanda a bolbe changa Kòrsou, burlando di konsultentnan ku ta bai tras di sen i pago en bes di hasi un prueba riba nan kapasidat di mira e parti práktiko di e problema.

Punda– E akuerdo mutuo entre Hulanda i Kòrsou, no tin niun spesifikashon kon Kòrsou lo kuminsá paga su debe bek. Prinsipalmente awor ku Hulanda ta propagandá pa fia Kòrsou 700 mion florin pa e debakel di Ennia. Hulanda ta menshonando sumanan sin spesifikashon kon e repagonan ta bai tuma lugá. Tin un proposishon di repago riba papel, pero e repago di 700 mion no ta inkluí òf aló ménos no ta menshoná.

Alexandra van Huffelen a konfirmá ku no tin spesifikashon kon tei paga debe bek. Segun van Huffelen, repago di debe no a forma parti di e akuerdo mutuo. Esaki e la duna di konosé den diferente rueda di prensa e enkuentronan ku medionan di komunikashon. Momento Kòrsou  a opta pa sigui e trayekto di konsenso e biaha aki den forma di un akuerdo mutuo, ta firmando un akuerdo sin kuantifikashon riba efektonan di e kondishonnan riba e situashon finansiero di Kòrsou i su kapasidat di repago na Hulanda.  Te ainda ni di parti di Hulanda ni tampoko di Kòrsou no tin kuantifikashon riba kontenido di e akuerdo den forma di ehekushon. Na e momentonan aki, kontenido di e akuerdo, pa lokual ta trata desishonnan kalkulativo ta nulo. Na promé lugá, te ainda no a menshoná kon ta bai restrukturá e debe na 4.2 miar ku Kòrsou tin. Ta trata di 2.4 miar di debe na Hulanda mas 911 mion na sosten di likides, 400 mion na fondo di sosten i entre 500 pa 700 mion na debenan serka kréditornan lokal. Un parti di e 4.2 miar ta den forma di fiansa pistol, unda no mester paga interes miéntras demas ta den fiansa na interes abou. Pero ta trata di 4.2 miar florin, ku te ainda ni e Areglo Mutuo ni tampoko e Pakete di Pais ta spesifikando na detaye kon Kòrsou ta bai paga bek. Mas ainda no ta dunando un indikashon tampoko kuantu e peso di repago lo ta riba gastamentu gubernamental i kon ta bai regla esakinan. Hulanda a pone kondishon, e tres islanan a firma, ademas sin atendé korektamente e problema di disputa. Kòrsou no tin niun idea riba e impakto makro ekonómiko di e fiansanan, inkluso esun proponé di Ennia.

E situashon ta inklaro i ta manera ku Hulanda ta sigui pusha pa firmamentu sin atendé e problema mas grandi Areglo di Disputa. Ta manera e pakete di pais, na nivel di ehekushon ta asumí e ròl di e Areglo di Disputa. “Si no paga tin kondishon”. Mirando e relashon hurídiko spesial di kua ta trata akí, no por afirmá di antemano ku 100% sertesa ku Korte Atministrativo tambe lo konsiderá su mes outorisá pa tuma konosementu durante un disputa. “No ta eksistí presedentenan legal pa ku esaki. Pa evitá un buraku den e protekshon legal relashoná ku un disputa spesífiko, e gobièrnunan a traha un protokòl. Den e protokòl akí, e gobièrnunan a akordá ku den un situashon asina, lo ahustá e areglo mutuo OR di tal manera ku ta mantené e posibilidat di protekshon legal pa e paisnan di Karibe.” Van Huffelen a entregá e protokòl akí tambe komo anekso, huntu ku su karta na Tweede Kamer splikando e proseso i kontenido dje Onderlinge Regeling.

Den e akuerdo mutuo tin ademas un protokòl di protekshon legal. Den e akuerdo mutuo a establesé ku ta apliká e Lei di Derecho Atministrativo general (Algemene wet bestuursrecht) meskos na e provishon di finansiamentu di parti di Hulanda pa proyektonan i medidanan di reforma (artíkulo 9). Sekretario di Estado Alexandra van Huffelen ta splika: “E eskoho akí ta un kontinuashon dje práktika eksistente durante e último añanan relashoná ku finansiamentu di proyektonan di derecho públiko di parti di Hulanda den e paisnan. E konsekuensia di e eskoho akí ta ku e órganonan atministrativo di Karibe ku por ta konsiderá komo partidonan interesá den un desishon di finansiamentu, por rekurí na Korte Atministrativo hulandes si surgi un disputa tokante e desishon tumá.”

Aparte di un splikashon korto, e areglo mutuo, no ta spesifiká kon e pakete di areglo finansiero –ekonómiko ta enserá. Ta trata di spesifikashon di e inyekshon finansiero, den forma di invershon i fiansa i kon e korelashon i relashon ta deliniá. Den otro palabra, Kòrsou no sa kuantu sèn Hulanda ta bai manda ni tampoko den ki forma esaki ta tuma lugá i kon pa paga bek. E areglo ta outorisá pa modifiká e struktura di kondishonnan pa ehekutá reformanan riba Kòrsou, pero sin tin un base i motibu, pasobra e reformanan no ta mara na un forma di repago òf refinansiamentu. Den 4 aña di tempu, e struktura di aktivonan finansiero na pais Kòrsou, por keda afektá mediante e reformanan menshoná den e akuerdo mutuo. E plataforma di desishon tambe por kambia ku konsekuenshanan severo. E akuerdo no ta preskribí kon leu su outoridat di ta yega den kuadro di por ehèmpel di aktivonan den nos kompanianan nashonal. Asina Kòrsou por pèrdè apoderashon den haf, energia i propio tera (grondontwikkeling).

E Areglo Mutuo ta mes òf mas peligroso ku tur e sinku Leinan di Konsenso na 2010, unda den práktika no tabatin kòntròl riba Kòrsou. E leinan di konsenso a resultá den teoria, pero Hulanda a ripara ku den práktika nan no tabata por a kontrolá mas. E Areglo Mutuo a trese e kambio, duna mas kontenido na e Pakete di Pais, ku manera kosnan ta bayendo, a bira e Areglo di Disputa, skondí ku Hulanda a stot Kòrsou kuné.