Raymond Knops, eks Sekretario di Estado pa Asuntunan i Relashonnan den Reino, for di 2020 a anunsia ku mester paga bèk.

Punda—E dianan aki tin un diskushon bastante serio den komunidat, si Hulanda mester refinansiá un parti di e debe ku Kòrsou, lagando un otro parti pa opsekio. Prinsipalmente e sosten di likides na 911 mion ta riba diskushon di opsekio.

E sosten di likides tabata destiná pa kubri kostonan okashoná pa Covid. Pero te ainda no tin un kontesta fiho. Segun deklarashonnan di minister di Finansas, Javier Silvania Covid a kosta Kòrsou 342 mion florin. Esaki e titular di finansas públiko a duna di konosé na desèmber 2022 durante presentashon di presupuesto na parlamento di Kòrsou. Segun e minister, na 2020 e gastunan dirèkt na Covid tabata 152 mion florin, na 2021 tabata 185  mion florin i 2022 e gastunan tabata 5,4 mion florin. Entretantu, mayoria sosten finansiero durante Covid a bai pa finansiá funshonamentu di aparato públiko. Esaki ta lokual sifranan di Banko Sentral ta indiká. No ta spesifiká un kalkulo di e 342 mion menshoná pa e minister. Lokual si ta konosí ta ku e finansiamentu pa Covid komo sosten di likides, kon esaki a wòrdu gastá.

Kontrali na e intenshon pa duna sosten na sektor privá, fondonan fo’i Hulanda bai pa sektor públiko durante 2020 i 2021. Miéntras segun minister di finansas Javier Silvania, den sektor privá tabatin mal uzo di e fondonan unda sierto kompanianan so tabata risibi miónes di NOW. Segun kálkulonan di Vigilante, durante 700 dia di Covid, Kòrsou a fia un suma di 911 mion florin pa finansiá défisit riba su presupuesto di likides. Por lo ménos 700 mion tabata kousá pa retrasonan den kobransa den impuesto miéntras un 211 mion normal pa finansiá défisit regulatorio debí na mal maneho, kual ta usual for di 2010 pa tur kabinete ku a sinta.

Kontrali na e intenshon pa duna sosten na sektor privá, fondonan fo’i Hulanda bai pa sektor públiko durante Covid. E gastamentu di fondonan pa Covid a inisiá for di 2020 i kontinuá te ku finalnan 2021 i inisio di 2022. Por ehèmpel, un re-kompilashon di e informashonnan finansiero na finalnan di 2020, durante impakto makro ekonómiko di Covid, Gobièrnu a invertí e sosten di likides pa paga su gastunan operashon i esnan retrasá. Por ehèmpel durante último dos luna di 2020, gobièrnu di Kòrsou a paga na ámtenar i nan salario un suma di 121 mion florin. Ta trata di pagonan pa salarionan neto, finansiamentu di VVU, Fondo di Penshun, retraso riba Fondo di Penshun i Seguronan Sosial. 121 mion florin ta 42% di e total suma ku Kòrsou a risibi pa Fondonan di Sosten na Novèmber di 2020. Pa lokual ta trata salarionan neto a paga 42.6 mion florin, VVU 35 mion (suma reserva), Penshun, 43.5 mion, retraso riba Penshun 28 mion florin i finalmente pagonan seguro sosial, 16 mion. Segun un kalkulo di likides ku Gobièrnu di Kòrsou a someté na Gobièrnu Ulandes pa finansiamentu di krísis finansiero di Covid-19 na 2020, un suma di 122 mion a keda presupuestá pa paga bolsa di ámtenar, finansiá for di fondonan risibi di Covid.

Na 2021, Kòrsou mester a fia mas sèn pa sigui finansiá e kostonan den personal di aparato públiko. Gobièrnu mester a paga 290 mion na salario durante último mitar 2021 unda mester a pidi e sosten di likides pa di dos mitar 2021, si kier a sigui paga salario di ámtenar. Esaki ta lokual sifranan di pronóstiko a señalá indikando tabatin un suma di 290 mion florin na salario pa kubri último mitar di 2021. Inkluso den e total di 290 mion na salario a konta e pago na retiro boluntario ku a suma 27 mion pa restu di 2021.

Pa 2022, te ku Yüni tabatin programá pa paga 257.3 mion florin na kosto di ámtenar. Na yanüari por ehèmpel a paga 44.3 mion florin. Gobièrnu di Hulanda ta haña ku e nivel di bida na Kòrsou, prinsipalmente di e ámtenar ta demasiado haltu kolektivamente.